Stichting Rancho recientemente a bini dilanti pa trece algun informacion hunto cu cu Plataforma Nacional Herencia di Sclavitud na Aruba. Dia 27 di januari a firma e carta di intencion caminda a inicia oficialmente pa institui un plataforma. Riba 29 di januari a bini un conferencia di prensa pa informa comunidad riba e plataforma den proceso pa legalisa y oficialisa. E trabaonan a cuminsa caba y miembronan di e plataforma a bay Hulanda pa representa Aruba den reunionnan cu tabata tin na Den Haag riba 31 di januari.
Esaki tabata e prome reunion unda nan tabata presente como plataforma pa asina ey atende cu e tema di conmemoracion di aña di sclavitud, y tambe tur locual tin di haber cu eventonan, actividadnan of cosnan cu tin di haber rond di e tema di pasado di sclavitud, y aña di conmemoracion.
Tur cos cu ta concerni tambe tur seis Isla den Caribe mirando cu tambe ta trahando riba tur e islanan riba e tema aki, y ta yegando hunto tambe como plataforma pa asina e haya su bos na Aruba y den Reino Hulandes. “Tin diferente dialogo cu a tuma luga y locual cu tin cu sigui, ta e parti ora cu gobierno a para e proceso di nan banda pa colaboracion den e tema. Asina ey un grupo civil manera Stichting Ranch y individuonan a yega hunto pa asin’ey traha hunto y representa Aruba den e tema di pasado di sclavitud, y aña di conmemoracion di sclavitud,” segun Clifford Rosa, president di Stichting Rancho.
E proceso a cuminsa for di prome di juli 2023, y lo tin te cu prome juli 2024 pa aplicacion di hopi proyecto, y esaki sigur lo bira un plataforma caminda lo por papia, debati y dialoga, duna conseho y charlanan. “Asina ey hunto por aplica p’e diferente fondonan disponibel.”
Pa loke ta e aspecto financiero, tin 33 miyon dividi den seis isla, dus cada isla ta ricibi 5.5 miyon euro pa envolvi den proyecto. P’esey ta haci un yamada na comunidad, organisacionnan y individuonan cu tin proyecto pa bini cerca Plataforma Nacional Herencia di Sclavitud pa haya guia riba con por sigui.
E plataforma a yega hunto cu e intencion pa establece pa un tempo largo segun Rosa. “E plataforma ta algo necesario mirando cu Corsou, Boneiro, tur a traha y ta pensa cu mester un plataforma pa atende cu diferente temanan, un plataforma NGO y totalmente independiente for di gobierno. E plataforma mester contribui den yuda comunidad engrandece conocemento di su herencia, y esey sigur ta un parti importante p’e plataforma. “Mirando cu sclavitud t’un herencia cu mester hancra den proceso pa haci mas investigacion, pa crea mas informacion tambe pa educa comunidad mas tocante e topico di sclavitud,” segun Rosa.
