Despues di un trayecto di algun decada trahando na Aruba Ports Authority N.V., recientemente a dicidi pa nan “separa for di otro”, esta APA y Humphrey Tromp. Pa hopi aña e ta ocupando e puesto di Financial Manager, asistiendo actual Gobernador Alfonso Boekhoudt tempo e tabata Director, despues Jossy Figaroa y actualmente Marc Figaroa. E mes tambe a solicita pa e puesto di Director na mas di un ocasion pero sin resultado, aunke cu el a ocupa e funcion como Director suplente na mas di un ocasion. Awe e no tin ni funcion ni tampoco trabou mas cu e compania.
Kico a sosode cu Humphrey Tromp a bandona servicio na APA of APA a core cu ne, no ta conoci pa nos. Un asunto cuestionabel pasobra como un compania estatal lo a spera un poco mas transparencia. Si tin algo robes a tuma luga, comunidad siendo doño di e compania mester sa.
Humphrey Tromp a caba Colegio Arubano y despues a studia y gradua na aña 1992 na Hogeschool West-Brabant, na Hulanda. E ta soltero awendia pero tin un yiu muhe. Practicamente el a forma henter su carera na Aruba Ports Authority N.V. pa hopi aña largo y a mira desaroyonan uno tras di otro, mescos ta Director bin y bay, mescos el a mira Gobiernonan bin y bay den e ultimo decadanan aki.
Fuentenan yega na e asunto a sigura na nos cu e proceso no a bay asina facil si. Prome cu a yega na un “deal”, a suspende Humphrey Tromp for di su funcion den forma abrupto y a prohibi’e di drenta edificionan di APA. Porcierto, te e siman aki ainda su auto di compania a keda para na e mesun luga unda el a lag’e e mainta cu el a bay traha den parkeerplaats dilanti e edificio di APA na Playa. Pa un persona cu a traha tanto aña asina pa APA, ta un asunto hopi serio mester a sosode pa por a yega na un decision drastico asina, pa cual a opta pa tuma e medida maximo, esta retiro inmediato dor di e compania.
