Chandrikapersad “Chan” Santokhi instala como presidente nobo di Surnam

542

Awe e Asamblea Nacional di Surnam a instala nan Presidente nobo, Chandrikapersad “Chan” Santokhi di 61 aña di edad, di e “Progressive Reform Party”. E ta reemplasa ex-Presidente Desi Bouterse, kende Corte a conden’e na aña 2019 pa asesinato na aña 2007. Oficialmente Desi Bouterse a haci e traspaso na Chandrikapersad “Chan” Santokhi, unda cu el a bistie e sjerp.

Chandrikapersad Santokhi ta un ex-Inspector y ex hefe di Polis. Su partido a gana 20 asiento di e 51 asientonan den e Asamblea Nacional, suficiente pa forma un gobierno di coalicion cu General Liberation y Development Party. Ronny Brunswijk di Development Party a bira e Vice-Presidente. Despues cu e Asamblea Nacional a scoge, Santokhi a bisa henter e pueblo pa nan pone schouder hunto y traha pa un miho Surinam.

El a papia riba e crisis financiero di Surinam y e pandemia di Coronavirus. Presidente Santokhi a bisa cu e gobierno forma ta riba e mesun polisa di traha pa un solo meta: e recuperacion di Surinam.

E nomber oficial di e pais ta Republica di Surnam cu ta ubica den Sur America. E ta e pais soberano di mas chikito den Sur America, cu solamente 165.000 km2 y tin un populacion di aproximadamente 575.990 habitante, di cual mayoria ta biba na e costa nort, den of rond di e capital Paramaribo. E economia di Surnam ta depende hopi di exportacion di bauxiet, oro, petroleo y productonan di agricultura. Dia 25 di november 1975 Surnam a sali for di Reino Hulandes y a bira un pais independiente. Awendia e ta miembro di e comunidad di paisnan Caribense, CARICOM, pero ta sigui tin Hulandes como e idioma oficial. Asina mes hopi ta comunica via Sranan Tongo, idioma crioyo cu base na Ingles. Surnam ta e unico pais independiente na mundo pafo di Europa na unda cu mayoria di e populacion ta papia Hulandes.