A mobilisa tur autoridad na sitio. Por a haya prome informacion na sitio caminda ta papia cu un persona lo a fayece debi na e accidente grave aki. Den e vehiculo tabata encontra dos menor di edad y un hende muhe cu lamentablemente un rato despues autoridad a confirma di a perde su bida.
Esaki a sosode den careda di 6:08 pm ora cu central di polis a ricibi alarma grandi di un accidente hopi serio riba Avenida Nelson Orlando Oduber (ex- Sasakiweg). A cera caminda y duna espacio pa Brandweer cuminsa traha mesora riba esfuerso di rescate.
A bin topa cu e vehiculo (a-29601) destrui y pega den un troncon di un mata mientras cu tabata haci maximo esfuerso pa saca e pasaheronan for di e posicion delicado cu nan tabata aden e momento ey. A transporta dos menor di edad cu urgencia direccion hospital tanten cu tabata bringa pa traha cu e persona pega den auto.
A compronde cu lo tabata trata di un hende femenino, muy probablemente mama di e criaturanan envolvi. A mira cu e situacion no tabata mustra bon. A corta e vehiculo pa saca e victima pero por a tuma nota caba cu e persona aki a perde su bida, na momento cu a tapa e curpa na e sitio.
Vocero di polis tambe a presenta mesora pa asina duna un prome declaracion oficial pero mucho no tabatin ainda como cu tin cu confirma nomber y informa famia prome cu saca cualkier nomber afo.
Un caso sigur lamentabel caminda un otro hende ta perde su bida den trafico. Cu esaki ta bira e di dos persona cu ta muri den accidente riba nos isla pa e aña aki. Na famia di e fayecido forsa, Headlines Group ta extende su mas sincero palabra di condolencia na tur cu e perdida tragico aki.
