E siman aki, director internacional di Royal Schiphol Group, Kjell Kloosterziel a haci un bishita di cortesia na varios grupo di interes. Durante su bishita, hunto cu CEO di Aruba Airport Authority N.V. (AAA), Joost Meijs, e ehecutivo Kloosterziel a reuni cu Gobernador di Aruba, Alfonso Boekhoudt, Prome Minister di Aruba, Evelyn Wever-Croes, Minister di Turismo y Salud, Dangui Oduber, e Hunta di Supervision di AAA y e team di liderazgo di AAA. Tambe el a bishita e sitio di construccion di Gateway 2030, Fase 1A na aeropuerto.
Durante e combersacionnan, tur a expresa y a reconfirma nan satisfaccion cu e cooperacion fructifero durante e ultimo dos decada entre Gobierno di Aruba, Royal Schiphol Group y Aruba Airport, cu a conduci na un compania y operacionnan saludabel den tur aspecto. Aruba Airport ta wordo considera door di esnan den e cooperacion como un infrastructura crucial pa Aruba y e punto di entrada pa Aruba pa miyones di turista y su residentenan.
Siman pasa AAA su relato anual y estado financiero 2022 a wordo acorda dor di Dangui Oduber, Minister di Turismo y Salud como representante di e accionistanan di AAA. Dangui Oduber, Minister di Turismo y Salud: “Nos ta satisfecho cu tin un relacion duradero y fuerte y cu e direccion strategico di aeropuerto ta prometedor. AAA a experencia resultado hopi fuerte na 2022 manera describi den e Relato Anual/Estado Financiero 2022. Mi tin confiansa den e futuro di aeropuerto y ta keda en espera di mira tur e desaroyonan nobo den 2023.”
Tocante AUA Airport
AUA Airport ta un di e aeropuertonan mas ocupa den region Caribe cu mas di 22 diferente aerolinea operando pa Aruba contribuyendo na mas cu 2.5 miyon pasahero pa aña y cu buelonan pa 22 diferente ciudad 34 diferente destinacion directo rond di mundo.
Di e mercadonan cu AUA Airport ta sirbi 79% ta for di Merca y Canada, 11% for di Latino America, 6% for di Europa y 4% for di Antia Hulandes te cu mart 2023. AUA Airport ta reconoce cu esaki ta danki na e economia stabiel, clima politico, hospitalidad, populacion diversifica y siguridad general di nos isla.
AUA Airport ta aspira pa bira un di e aeropuertonan den region Latino Americano & Caribense mas sostenibel, sigur y a prueba di futuro, brindando un luga di trabou confiabel y facilidadnan di aeropuerto moderno y un servicio excelente cu ta refleha hospitalidad Arubiano, contribuyendo na un futuro prospero pa Aruba.
Conoce mas di loke ta pasando na AUA Airport y dor di bishita www.airportaruba.com y connecta cu AUA airport riba Twitter.com/Aruba_Airport, Facebook.com/ArubaAirport, Instagram.com/arubaairport/ and Linkedin.com/ArubaAirport.
