Parlamentario di MEP, Dangui Oduber, a critica AVP duramente pa no a sostene e mocion di Mike de Meza cu tabata busca aumento di salario minimo entrante prome di januari 2027.
Durante un entrevista despues di reunion publico di Parlamento di diabierna anochi, Oduber a lamenta cu De Meza, kende tabata number dos riba lista di AVP, a termina bira parlamentario independiente.
Segun Oduber, e mocion di De Meza tabatin un bon intencion pa mehora calidad di bida di empleadonan. El a cuestiona pakico AVP no a respalda su propio parlamentario, considerando cu e partido ta declara cu ta comprometi cu bienestar di pueblo. Oduber a indica cu durante e ultimo 25 añanan, MEP a contribui na aumento di salario minimo cu aproximadamente 800 florin, mientras cu Mike Eman, segun e parlamentario, a aumenta e salario minimo cu solamente 130 florin durante su trayectoria politico.
E parlamentario a critica tambe e desacuerdo entre AVP y FUTURO tocante necesidad di estudio adicional, mientras cu finalmente coalicion a vota pa implementa e aumento prome di maart 2027, na luga di januari. Segun Oduber, aumento di salario minimo ta urgente considerando cu costo di bida ta sigui subi y poder di compra di famianan ta deteriora. El a acusa Gobierno di aumenta gastonan di personal y biahe, mientras cu ciudadanonan ta enfrenta dificultad pa cubri nan necesidadnan basico.
Na final, Oduber a califica e salida di De Meza como un situacion lamentabel y a indica cu coalicion ta keda cu un mayoria chikito. Segun e parlamentario, prioridad di Gobierno mester ta mehora entrada y calidad di bida di pueblo.
Pa mas detaye lesa TREMPAN.
