E aprobacion di presupuesto supletorio ta duna Gobierno espacio pa continua cu su programa di inversion y medidanan social, entre otro aumento di pension, asistencia financiero y renobacion di infrastructura.
Despues di un jornada parlamentario largo y intensivo, Parlamento di Aruba a aproba unanimamente e presupuesto supletorio di Pais Aruba. E aprobacion ta un paso importante pa Gobierno continua cu e ejecucion di su maneho y e proyectonan destina pa mehora condicion di bida y fortalece diferente sector di comunidad.
Reaccionando riba e aprobacion, Minister di Labor, mr. Wendrick Cicilia a expresa su satisfaccion cu e resultado di e deliberacionnan y a felicita tanto e gabinete como e parlamentario nan di e coalicion pa nan sosten durante e proceso parlamentario.
Segun e mandatario, e aprobacion di presupuesto supletorio ta garantisa cu Gobierno por sigui cu e prioridadnan cu a establece desde su entrada den funcion: Mehora experiencia di bida di e ciudadano y haci Aruba mas fuerte mediante inversionnan den comunidad.
Facebook Live
Aumento historico di 500 florin pa pensionadonan
Un di e medidanan cu e representante a destaca como uno di e logro principal di e gabinete actual ta e aumento di 500 florin pa pensionadonan. El a califica e aumento como historico, indicando cu e medida tin un impacto directo riba e economia familiar di e adultonan mayor.
Segun su declaracion, e aumento ta duna pensionadonan mas capacidad pa enfrenta nan gastonan diario, cubri necesidadnan basico y cumpra cu gasto di medicina y salud. No ta trata solamente di tin alimento riba mesa, sino tambe di brinda e adultonan mayor mas trankilidad y un miho calidad di bida.
Pa mas detaye lesa TREMPAN.
