Den cuadro di e preparacion pa e futuro desaroyo di Burubundu Residences na Pos Chiquito, Minister di Vivienda, Infrastructura, Servicio Interno y Telecomunicacion, drs. Rene Herdé, a tene un reunion di coordinacion cu e companianan di servicio publico (nutbedrijven), cu e meta pa prepara na tempo e infrastructura necesario pa e desaroyo di e area residencial nobo.
Burubundu ta un area di aproximadamente 43,8 hectar, cu capacidad pa entre 850 y 1.000 unidad di vivienda. Pa por realisa un proyecto di e magnitud aki, ta esencial pa e infrastructura di awa, electricidad, telecomunicacion y sistema di riool wordo planifica y coordina desde e fase inicial.
Durante e reunion a trata e necesidad pa un plan integral di servicio publico, den colaboracion estrecho cu WEB, ELMAR, SETAR y AWSS. E enfoke ta pa evita trabounan separa y sigura cu diferente servicio wordo instala di un manera ordena y eficiente.
Un di e puntonan principal ta e proposicion pa establece un coredor bou tera comparti, caminda cada compania por instala su cable y tuberia na diferente profundidad, respetando e distancianan tecnico y zonanan di siguridad necesario.
E concepto ta:
- WEB pa suministro di awa pa bebe.
- ELMAR pa electricidad y coordinacion di iluminacion publico.
- SETAR pa telecomunicacion y fibra optico.
- AWSS pa e sistema di awa di desperdicio y drenahe.
E coordinacion aki ta importante pa proteha e infrastructura instala, facilita trabou di mantencion y reduci e riesgo di daño durante y despues di e construccion. Tambe mester pensa riba espacio pa tuberia di proteccion, pa facilita posibel ampliacion den futuro.
Durante e preparacion, e companianan mester contribui na un inventario di e infrastructura existente, determina e capacidad necesario pa e cantidad di vivienda planifica y prepara un diseño integral pa e instalacion di tur servicio.
Tambe ta necesario pa coordina e ruta di tuberianan y cable, e materialnan, e tempo di entrega y e planificacion di trabou cu contratistanan civil. Durante e ehecucion, lo mester tin control conhunto pa evita daño na infrastructura cu ya ta instala y pa sigura un inspeccion y entrega final coordina.
E reunion tambe a trata e responsabilidadnan tecnico pa diferente facilidad, incluyendo iluminacion publico, cranchi di candela, transformator, drenahe di awa di yobida, camindanan y acera.
Un otro aspecto importante ta e necesidad pa establece acuerdonan cla tocante financiamento, costo di ampliacion di red, conexion individual di vivienda, compra y instalacion di transformator, responsabilidad pa mantencion y maneho di e infrastructura despues di entrega.
Pa esaki, cada compania mester prepara un proposicion tecnico y financiero cu ta inclui su necesidad di capacidad, diseño, ubicacion di instalacion, calculacion di costo y planificacion di ehecucion.
E siguiente paso ta defini e personanan di contacto y encargadonan tecnico pa cada compania, organisa un inspeccion conhunto di e area y evalua e diseño di e coredor, e costonan y e planificacion.
Cu e preparacion conhunto aki, Gobierno ta busca pa sigura cu e infrastructura esencial di Burubundu wordo planifica desde e principio, cu coordinacion entre tur e companianan envolvi y cu atencion na e necesidad di e futuro habitantenan.
