Parlamento di Aruba a aproba unanimamente awe marduga un mocion cu ta urgi gobierno pa aumenta salario minimo mensual cu Afl. 200 netto, pa mas tarda dia 1 di maart 2027. E mocion ta contempla tambe compensacion pa empresanan, cu e meta di evita cu ta pasa e gastonan adicional pa consumidor via aumento di prijs.
E iniciativa original a sali di parlamentario Mike de Meza, kende a urgi pa un aumento inmediato di salario minimo. Sinembargo, despues di deliberacion den coalicion AVP-Futuro, a opta pa adapta e fecha di introduccion. Den e version aproba, ta pidi gobierno pa prepara y introduci e medidanan legal necesario pa e aumento drenta na vigor pa mas tarda 1 di maart 2027.
E documento ta presenta e aumento di Afl. 200 netto como un prome paso pa acerca salario minimo na un nivel cu ta permiti trahadornan cubri nan necesidadnan basico. Den su consideracionnan, e mocion ta menciona un aumento di aproximadamente Afl. 2.007 pa Afl. 2.207 pa luna.
Eman: acuerdo pa yega na bestaansminimum den tres aña
Aunke e mocion ta papia di acerca salario minimo na e bestaansminimum, e texto aproba no ta contene un garantia explicito cu salario minimo lo alcanza e nivel ey den tres aña.
Loke e mocion si ta pidi ta pa evalua y actualisa e bestaansminimum di CBS, cu tin como periodo di base october 2010. Despues, gobierno mester presenta Parlamento un proposicion di maneho den fase pa trece salario minimo mas cerca posibel di e bestaansminimum actualisa, teniendo cuenta cu capacidad economico y costo di bida.
Prome minister Mike Eman, sinembargo, a sigura cu tin un acuerdo den coalicion pa yega na nivel di bestaansminimum den tres aña, despues di deliberacion cu gremionan comercial y sindical. Esaki ta e compromiso politico cu Eman a expresa; e plazo di tres aña no ta figura den e mocion aproba.
Compensacion pa empresanan
Un parti central di e mocion ta e peticion pa introduci, pareu cu e aumento di salario minimo, un regeling di compensacion pa doñonan di trabou den sector comercial. Como un posibilidad, e documento ta menciona compensacion via e pagonan mensual di BBO, BAZV y BAVP.
Pa trahadonan cu ta traha parttime, mester calcula e compensacion proporcionalmente. Tambe mester tin un mecanismo adecua pa empresanan cu no tin suficiente impuesto riba volumen di negoshi pa paga y asina por probecha e compensacion completo, por ehempel via un verrekening of restitucion.
E meta ta neutralisa e gastonan adicional pa doño di trabou tanto cu ta posibel, incluyendo carganan adicional directamente relaciona cu e aumento, pa proteha empleo, continuidad di empresa y stabilidad di prijs.
Dialogo no mester retrasa aumento
Parlamento ta pidi gobierno cuminsa sin tardamento un dialogo structura entre gobierno, organisacionnan di doñonan di trabou y sindicatonan, cu participacion di representantenan di sector comercial.
Den e deliberacionnan aki mester analisa medidanan structural pa baha gasto di empresa, mecanismonan alternativo di compensacion y e efecto di e aumento riba empleo, prijs, gasto empresarial y poder di compra.
Alabes, e mocion ta stipula cu e dialogo, e buskeda di alternativanan of e preparacion di reformanan no mester bira un motibo pa pospone e aumento di salario minimo.
Ta pidi Gobierno tambe pa informa Parlamento di antemano tocante e consecuencianan calcula pa presupuesto nacional, entradanan di impuesto y financiamento di servicionan publico. Mester evalua e regeling di compensacion anualmente.
Cu e aprobacion unanime, Parlamento a duna un señal di sosten pa mehora poder di compra di esnan cu ta gana salario minimo. Awo ta na gobierno pa elabora e base legal, e cobertura financiero y e mecanismo di compensacion necesario pa realisa e aumento pa mas tarda dia 1 di maart 2027.
