Comite Olimpico Arubano a inuagura e cas di deporte na Aruba. E mainta a habri cu un demostracion di 9 deporte rond di henter e area di e oficina di COA. Un cantidad grandi persona den e mundo di deporte y varios mandatario a bini hunto na e ocasion aki. E evento a cuminsa cu un demostracion di nos atletanan local den e Festival di Deporte.
Minister di Deporte, Endy Croes, durante su speech a indica cu tempo cu Aruba tabata forma parti di Antia Hulandes, a participa pa prome biaha den e weganan olimpico di aña 1952. Shete deportista a forma parti dje ekipo di Antia Hulandes. Siguientemente, Aruba a participa den weganan na aña 1976 na Montreal. E aña ey un persona a competi den judo.
“Nos ta extremadamente contento di ta aki awe”, tabata palabra di Wanda Broeksema, e actual presidente di Comite Olimpico Aruba. El a continua bisando cu ta masha tempo nan tabata warda pa un oficina di e tempo aki. Pa Comite Olimpico ta importante pa por tin nan propio cas olimpico. E diseño di e cas olimpico aki ta conta un storia.
Nicole Hoevertz, secretario general di Comite Olimpico, a cuminsa bisando cu soño por bira realidad. Locual cu a cuminsa den un oficina masha humilde situa den un stadion cu no tabata den masha bo estado. Na cierto momento e oficina ey e te hasta bira peligroso pa e trahadonan. Hopi hende a duda pero Comite Olimpico a demostra cu tabata posibel.
Thomas Bach, presidente di IOC, a cuminsa na felicita e Comite Olimpico pa un edificio cu lo bolter un pagina den nan historia. Cu e edificio aki nan lo ta den un miho condicion pa sirbi e deportistanan. El a mira e determinacion y pasion den e deportistanan.
