Diasabra tabata e ultimo dia di e Weganan Eskolar Interinsular na Boneiro. Aruba, Boneiro y Corsou a competi.
Silvio Semeleer, representante di INDEBON, a duna di conoce cu e weganan a cuminsa diabierna y caba diasabra. E programa a cuminda for di diahuebs na momento cu delegacion di Aruba y Corsou a yega Boneiro. Diabierna pa 9:00 am a cuminsa cu e weganan na Club Soho y a finalisa pa 2:00 pm. Despues di a termina cu e weganan, a hiba e hobennan rond di Boneiro pa nan conoce un poco mas di e isla. Diabierna atardi pa 5:00 pm a haci e apertura caminda nan a cera conoci cu e parti cultural di Boneiro.
TORNEO A BAY BON
Silvio Semeleer a sigui splica cu e torneo di dam a bay hopi bon. Hopi di e hobennan aki a competi pa prome biaha den un programa escolar. Cada un di nan a experiencia e torneo na nan manera. E torneo di schaak tambe tabata mesun cos. Den un opinion general, e weganan a bay hopi bon. Pa shete aña no tabatin wega escolar interinsular. INDEBON a tuma e iniciativa y nan a bishita Corsou y Aruba pa presenta e idea. For di aña pasa e cuminsa prepara tur cos pa cuminsa cu e weganan. Aki dos siman lo bay Corsou y despues di tres siman lo ta na Aruba. Lo prepara pa 2024 caminda cu mas hoben lo tin oportunidad di participa.
A pesar di e retonan cu vuelo y e distancia entre e islanan por mira cu e hobennan tin e gana di participa den e weganan. Semeleer a comenta cu tur deporte ta ricibi un acogida for di e hobenna.
SIÑA OTRO
Jaylee Krosendijk, di Colegio Conrado Coronel, a siña hopi durante su bishita na Boneiro y ta contento di por a bay cu varios di su amiganan. Jaylee ta di pensamento cu Boneiro ta basta grandi. El a bishita e seronan di salo. El a siña tocante e historia di Hulanda. Pa Jaylee ta importante pa bay otro isla pasobra ta representa Aruba y ta siña di otro.
BON WEGA
Zyon Jacobs, di Colegio San Hose, su experiencia a bay hopi bon y a hay’e leuk. El bay e sero di salo y alabes a haya informacion tocante e historia di e cas di e catibonan. Locual mas a impresion’e ta e lama color ros. E competencia a bay bon y e demas mucha tambe a hunga bon.
COMPETENCIA A BAY BON
Mohid Sharma, di Scol Primario Kudawecha, tabatin un bon experiencia na Boneiro. E ta di opinion cu e Bonerianonan ta hopi lief. Locual a impresion’e ta e seronan di salo y tambe e lama. El a gusta cu e por a bay y representa Aruba. Pa Mohid e competencia a bay bon y dushi pa hunga contra otro isla.
CRECE DEN E DEPORTE
Silvy Cabral, di De Schakel, a comenta cu e torneo a bay bon pa e dos ekiponan. E ta di pensamento cu Aruba y Corsou por siña hopi di e torneo. Ta importante pa por participa pasobra por siña hopi durante tipo di competencia asina. Silvy a competi den Schaak, e ta practica esaki desde cu e tabatin cinco aña. El a sigui crece den e deporte.
GANA TRES BIAHA
Anastacia de Palm, di Faith Revival School, su experiencia tabata dushi maske na cuminsamento e tabatin poco miedo pa motibo cu nunca el a biaha sin su famia. El a haya un experiencia nobo cu e biahe aki. E mes tin famia na Boneiro y a yega di bay caba. E competencia a bay bon, el a gana tres biaha. Na ultimo ora a scoge pa Anastacia y e tabata nervioso mirando cu e no a train manera mester ta.
