Den trainingnan di Calamidad e resultado no ta miho cu aña pasa

Bureau Rampenbestrijding Aruba tabata tin varios sesion di training pa dianan largo riba e parti di tsunami cu varios Departamento di Gobierno y stakeholders. Segun Rino Hermans, CaribWave ta un di e trainingnan regional cu Aruba ta cumpli cun’e tur aña.

Tur di dos siman di Maart regionalmente ta train riba tsunami. Instancia y cientificonan ta preocupa cu tsunami ta un peliger grandi pa e region Caribense, pa cual nan ta pidi pa tur pais ta prepara pa tsunami y Aruba ta cumpli cu esey.

 

Ta conoci cu na Maart nan ta train esey. Despues di e training aki, ta evalua y ta certifica e departamentonan. E resultado final ta wordo anuncia riba dia 5 di November, cual ta e dia mundial di conscientisacion di tsunami. Eynan ta haya sa con e resultado tabata.Pa e aña aki, na nivel nacional, compara cu 2018, Aruba a bay atras. Pero riba tereno individual, cada instancia y hotel, tabata tin adelanto remarcable, cu ta duna un trankilidad cu nos ta riba e bon caminda, segun Hermans.Pero na nivel nacional si, por bisa cu e resultado preliminar ta duna indicacion cu, compara cu 2018, nos a bay atras den 2019.

E por tin hopi factor cu ta hunga un rol. E aña aki carnaval a caba den Maart. Por ta e departamentonan no tabata tin mucho tempo pa prepara pa un training. Pero un incidente, un tsunami no ta warda riba ningun fiesta caba pa bisa cu e ta bin. Semper mester biba prepara. Rampenbureau tin un structura di evalua, cu ta conoci cerca e departamentonan, y esey a aplica caminda cu a duna un resultado cu no tabata alentador, compara cu 2018. Riba nivel internacional si nan tabata contento cu e participacion di Aruba. Esey ta nifica cu pa Rampenbureau 2020, tin un trabao pa haci pa sigui motiva nos hendenan y pa nan ta miho prepara.

Tin cu compronde cu bo por tin un plan skirbi, pero si full bo structura no conoce e plan, ora cu bo ta bay ehecuta e plan, e ta bay bira un problema en bes di un ayudo. Esey ta loke cu Rampenbureau ta constata constantemente, cu tur hende tin cos skirbi riba papel, pero full e organisacion no ta conoci cu e plan. E plan mester ta conoci pa tur hende den e departamento pa e por ta un plan cu por dunabo asistencia y coordinacion durante un incidente cu a pasa bo test bo capacidad. Pais Aruba tambe sa precies kico ta su capacidad y e parti fuerte pa deal cu un incidente di e magnitud aki.

Evaluacion

E parti nacional di 2019 ta cla. Awor aki ta bezig cu e parti individual di cada departamento y hotel. Caribwave ta e unico training nacional y regional cu tur hende por participa. Un famia tambe por inscribi y participa. Asina por tin full e isla ta train. Ta e unico training cu tur instancia sea comercial, gubernamental ta participa. Awor aki caba ta preparando pa e prome scenario cu lo sali na October. For di eynan Rampenbureau ta cuminsa analisa kico por pone na su luga.