Un persona cu ta huur apartamento na Boegoeroei a haya problema formal cu un huurdo cu e kier a saca afo debi na molester cu e tabata causa. E situacion a causa cu mester a mobilisa mas cu un unidad pa yega nan coleganan na e sitio.
Segun por a compronde for di un di e empleadonan, e manager a informa e huesped for di dia 29 di mei caba cu e no ta bon-bini mas den e compleho di apartamento, debi na e tantisimo molester y problemanan cu el a causa den e corto tempo cu e tabata eyden. El a haya un carta firma cu e mester bandona e apartamento awe, diabierna, prome cu 12’or di merdia pero tampoco e no kier a cumpli cu esaki.
Na momento cu a bay hala su atencion, a surgi un problema pa cual mester a yama Polis. Parce cu ni esaki no a spanta e huurdo, ya cu den presencia di Polis el a lansa menasa y kier a tira un trahado for di balcon. Esaki lo por trece problema serio pa e ciudadano pasobra si e trahado entrega keho contra dje, e por hasta wordo acusa di intento di asesinato.
E persona aki, kende ta wordo bisa e ta un “beachbum”, a drenta e apartamento dia 27 di mei, no su so pero cu 4 cacho. Un di su mascotanan a wordo alcansa pa un auto y a muri. Di e tresnan cu a keda, un di nan ta hopi agresivo y hasta kier a ataca un di e Polisnan, y esaki tabata un problema pa e otro huurdonan tambe.
Den e periodo cortico cu e tabata den apartamento a yama Polis 4 biaha caba p’e y nan a logra combersa 3 bes cun’e. Pero awo cos a bira di mas. Hasta ora di su detencion, el a logra los un di su mannan di boei y tabata zwaai cu esaki, tratando di evita cu e ta wordo deteni y hiba warda. Debi na su comportacion mes, a pidi refuerso policial, inclusive a uza helicopter cu a spanta hopi hende keriendo cu ta algo hopi grandi a sosode.
