Diaranson anochi, c’un tempo di awa menasando, e pueblo Carnavalesco a subi bay San Nicolas p’asina apoya Chocolate City cu nan tremendo Parada di Luz.
Un total di nuebe grupo mas o menos 5275 participante a yena e cayanan di San Nicolas cu nan fantasia y creatividad.
Quality Brass tabata tin e honor di a habri e Parada di Luz cu e aña aki ta celebra 23 aña desde cu e Comision di Parada di Luz San Nicolas a organis’e pa prome biaha.
E parada a sali na ora, pero hopi di e gruponan for di trempan tabata keha cu e tabata bayendo hopi lihe. Manera ta e caso cada biaha, e participantenan di e prome grupo cu no a yega na ora pa ora di stel op, a haya nan ta cana den e parada pa nan por yega na nan grupo.
Por a compronde cu a core e parada pa saca tur grupo y despues e slow down e parada dunando un y tur e oportunidad di disfruta di e dushi musica di Carnaval.
E grupo cu a habri e parada tabata T.O.B., ya cu nan tin e Reina di Carnaval, pues a toca nan e honor di lidera e parada. Nan tabatin un total di 1800 participante y ‘NFuzion tabata encarga cu e ambiente pa asina pone tur participante gosa sin fin.
Grupo number dos tabata Grupo Champagne, bou di liderazgo di Lienchi Merryweather cu nan tema Jams and Gems, c’un total di 1500 participante. Tsunami tabata pone ambiente y tambe nan tin e Rey di Soca di e aña aki, cual ta Galloway cu su Mash Up.
Na di tres a haya OPC Carnival Group, c’un total di 75 participante y tabata lidera pa Lisbel Pop. Nan tema di e anochi tabata sailers y OREO a pone un dushi ambiente.
Siguientemente a haya Colors Carnival Group, c’un total di 50 participante. Por a tuma nota cu nan momento cu e parada a Sali, ainda niun participante no a yega. Sigur, algo di lamenta. Orario ta hopi importante na ora di stel op. Nan tabata compaña p’un DJ pa pone un dushi ambiente. Lider di e grupo tabata Abby Emmanuel.
Como grupo number cinco a haya DUSHI Carnival Group, cu a tema Disco Sensation, c’un total di 400 participante. Nan tabata compaña pa Jeon & Band, cu tampoco tabata completo na momento cu e parada a sali. Lider di e grupo ta Aldrick Croes.
Siguientemente grupo number seis rib’e lista tabata Royal Carnival Group, cu nan tema The Royal Carnaval Cruise. Nan a bin cu 250 participante y musica tabata na encargo di NBO. Nan lider di grupo ta Vivian Hooker.
Infinity Carnival Group tabata grupo number shete y nan a subi caminda c’un total di 200 participante. Tema di e anochi aki tabata Soy Rebelde. Musica tabata na encargo di DLS. Julie Hernandez t’e lider di e grupo.
Empire Carnival Group tabata e siguiente grupo, grupo number 8 y nan a subi caminda cu 800 participante. Buleria tabata tin e encargo di buta ambiente y pone e participantenan disfruta. Mester menciona cu Buleria tin e Rey di Groovy Soca, Rocco Franken. Queeny Bergen t’e lider di e grupo.
Last but not least, Don Flip Carnival Group a cera e Parada di Luz, cu nan titulo Casino Night, c’un total di 250 participante. Youth X-treme a pone tur hende bay plat, dal e baile di Wiki Wiki y pone ambiente henter anochi. Lizandra Geerman t’e lider di grupo.
Last Lap ta na encargo di Musical Time, cu lo toca e roadmarchnan gusta p’e pueblo, manera Hard Self, Jump with your towel y asina por sigui menciona. Pero tambe nan lo toca e canticanan di e ultimo añanan. Cu Musical Time bo lo bay bek den tempo y bin bek den 2024.
