Adaptando na e realidad actual ta yega www.deliveryaruba.com. E website aki ta un registro gratis online pa tur compania na Aruba cu ta haci delivery, pa chofernan independiente disponibel, ademas di restaurants y supermercado.
E iniciativa ta di Julien de Bats de onehappyphotographer.com, kende awo ta pone su conocemento den multimedia na servicio di comunidad cu ta buscando alternativanan pa afronta e retonan di awendia relaciona cu e crisis mundial di salud. E website ta completamente gratis pa tur hende usa, dus tanto pa e consumidor, como pa e clientenan.
E idea su tras ta pa ofrece un manera facil pa comunidad por continua cu algun di nan custumber y smaaknan, mientras cu di otro banda, negoshinan por sigui mantene nan operacionnan. Como usuario bo ta bay na e website, bo ta scoge loke bo ta desea di ordena y e compania di entrega cu lo hib’e cerca bo. Como comerciante, bo kier registra akinan lo mas pronto posibel pa asina bo tambe por cuminsa haci uso di e facilidad aki. Ta haci un yamada na tur e compania di delivery, chofernan particular pa tambe registra.
E plataforma ta mustra cada negoshi cu nan menu/opcionnan, ki ora nan ta habri, nan number di telefon, y con bo ta desea di paga pa bo ordo. Tambe e website ta resalta cua ta e companianan cu ta haci entrega exclusivamente pa hendenan grandi y/of cu sisteman inmunologico zwak. Pronto lo bay ofrece e servicio aki na e mercado di Corsou, caminda aya tambe comercio y clientenan lo por bay topa otro.
