Trahadonan di Riu Palace cu ta malcontento a tene un accion pafo di hotel pa decisionnan cu gerencia a tuma. Tabata presente presidente di FTA Hubert Dirksz, kende a splica cu a mira pa algun dia caba cu tin un conflicto entre trahadonan y gerencia relaciona cu medidanan cu mester tuma despues di cierre di frontera.
E decision di gerencia ta cu tur hende ta bay cas, ta uza dianan di vakantie y despues ta cuminsa conta e bonus den dianan cu ta keda cas y despues manda e trahadonan pa Gobierno pa ricibi e 950 florin.
FTA ta sali di punto di bista cu Gobierno tin un anuncia cu el a haci, pero ta mira cu hopi compania no kier respeta decision di Gobierno. Na momento cu a surgi e expresion di “no work no pay”, hopi compania a wanta na esaki, segun Dirksz. Y dunadonan di trabou a manda trahadonan cas y a bisa nan pa acudi na Gobierno. “Hasta tabata chantagea nan cu si nan no firma un documento, nan no ta bay haya e 950 florin for di Gobierno.”
Dado momento FTA a papia cu gerencia na Merca y nan a bisa cu no ta problema y ta mantene nan mes na decision di Gobierno, pero awo a chek y atrobe a hala atras. FTA lo bay bringa derecho di trahadonan, teniendo cuenta cu hurisprudencia.
Si e trahadonan bay cas awo mes cu vakantie, lo bringa esey. Pasobra tin contracto cu ta valido y mester ricibi nan derecho segun e contracto y segun decision di Gobierno.
A pidi nan pa pone tur cos por escrito pa e trahadonan, pero nan a bisa cu e ta bay tarda pasobra mester consulta cu nan Abogado. Posicion di Gobierno ta hopi cla, luna di maart mester wordo paga. Nan kier haci esey y dje e pago di bonus ta cuminsa.
FTA kier pa respeta y no impone. Mester sinta y dialoga y yega na acuerdo.
Tin un violacion hopi grandi y ta mustra e berdadero cara di “doñonan di trabou capitalista salvahe cu no ta respeta e ser humano. Nan ta pone placa na prome luga.” Mester yega na un balance y si yega na impasse, e ora ta uza reglamentonan cu Gobierno a pone, pero mustrando cifranan. No por impone riba trahadonan bisando cu no tin placa siendo cu tur compania mester tin fondo pa wanta un situacion asina. Mester bay den bo reserva y trahadonan mester bay duna di su banda.
Ta consciente cu mester reduci orario di trabou y pero e entrega mester ta limita si. Awo nan kier nan salario di maart, djei april y mei pa despues negocia e resto.
Dirksz a bisa tambe cu Aruba tin un reto hopi grandi, mester pakete pa trahado y doño di trabou. Tur empresa mester por aporta, y Hulanda tambe aporta pa yuda Aruba. “Nos no ta sobrevivi e situacion aki nos.”
A manda trahadonan cas, pasobra e reunion aki ta un peligro pa e mesun trahadonan, pasobra tin sindicato y hues pa regla e situacion.
