Diadomingo atardi a yega Aruba e delegacion di taekwondo kende a competi den e Worldwide Martial Arts Open. Na nan yegada na Aeropuerto Internacional Reina Beatrix tabata spera nan famia, conoci- y amistadnan kende a duna nan un caluroso bonbini.
Melvin Garcia tambe a forma parti di e delagacion como experto den comunicacion, durante un entrevista cu 24ora.com el a comenta cu nan a surpasa tur expectativa. Esaki ta prome biaha cu Taekwondo Aruba Team a participa den TK5, kende ta un evento na nivel internacional. Un grupo di cinco hoben den caterogia mas chikito a sa di haci un tremendo papel.
E tabata un momento di hopi nervio y emocion. Na momento cu a anuncia e pelea, luz a paga, musica a cuminsa, efecto di luz y publico tabata apoya nan atleta faborito, sigur un momento inolvidabel pa e atletanan. Na prome instante kere cu Aruba lo bringa contra di Puerto Rico pero a resulta cu a bringa cu un ekipo di Merca.
Ora a subi a sa di pone show y logra gana puntuacion hopi halto. Maske tabata nan prome biaha participando, asina mes a logra haci un tremendo papel. E ta un satisfaccion pa mira e muchanan bringa di un forma bon prepara. Nan a train duro y despues di colecta placa pa por yega Orlando, por bisa cu ‘job well done’. No solamente esunnan di mas chikito a logra medaya respeta, pero tambe esunnan di categoria mas grandi.
Team Aruba a consisti di varios atleta di diferente club na Aruba. Na Aruba tin torneo cada cuater luna pero na Merca ta cada luna. A conta cu mas di 350 atleta cu a topa otro den un solo evento. Tabatin participacion di no solamente Aruba pero paisnan manera Haiti, Puerto Rico, Merca mes y mucho mas. A bin cas cu oro, plata y diferente premio grandi.
