Nos hendenan ta sinti nan mes bon ora cu Aruba subi den algo. Por ehempel ora nos beachnan sali number un di mundo. Pero no tur subida di interes ta bon. Principalmente ora ta trata nos debe nacional!
Recientemente, pais Aruba a pasa un ley pa cambia e manera cu lo cobra interes riba 4 prestramo cu ta yega un suma di casi U$ 550 miyon. Antes nos tabata uza un instrumento yama LIBOR, riba esey tabata agrega un prima, pero awo nos ta uza un otro yama SOFR. Pa compronde con ta traha cu esaki, mester sa cu LIBOR tabata un instrumento pa yuda calcula tasa di interes. Pero e tabatin su limitacionan. A base di esaki, gobierno mester a cambia pa un instrumento nobo, SOFR, cu ta mas confiabel y transparente. Siman pasa mi a puntra ta ki interes Aruba lo bay paga pa e prestamonan den futuro. E ora ey ainda mi no ta sa di un ley cu a pasa apenas 2 siman pasa.
E ley di 11 di october2 023, ta stipula cu Aruba awo lo uza SOFR como un forma di midi interes pa nos prestamo. Nos ta papia di un suma grandi aki, mas cu 950 miyon florin. Esey ta mas placa cu e prestamo Hulandes, e 916 miyon florin cu mi a skirbi recientemente riba dje. Aki tin un cambio importante den con ta calcula e tasa di interes riba nos prestamo. Pa ilustra.
Pa un di e prestamonan aki, pa e periodo di maart 2023 te september 2023, nos ta paga un tasa di 10.54% (5% + %.54&) pero despues di esey, e tasa di interes lo cambia dependiendo di cierto regla manera stipula den e leynan y e acuerdonan di prestamo cu por cierto ta mara na ley di New York y no na ley di Aruba. Aki nos “independencia” a cay cortico.
E tasa di interes cu ta surpasa 10% ta halto, pero ainda asina ta mas barata cu e tasa di interes di e prestamo Hulandes cu ta 6.9%. Corda cu esaki por tabata hopi mas abou, 3.2% pa ta exacto. Ta importante pa sa cu ta paga hopi interes riba nos debe y esaki por tin su consecuencianan serio pa nos pais. Con nos lo haci pa paga e debe aki?
Lamentablemente, gobierno no a tuma e paso pa duna un anuncio oficial ni un conferencia di prensa pa splica e tasa di interes halto aki na nos pueblo. Ta importante pa gobierno tene nos informa y brinda claridad riba e asuntonan manera esaki cu ta afecta nos tur. Tur hende mester sa con nan ta maneha e asunto financiero, specialmente na momento cu ta trata di tasa di interes halto manera esaki. Ta di ta spera cu gobierno lo tuma e medidanan necesario pa maneha nos debe di un manera sostenibel. E ta un asunto cu tur hende mester ta informa y preocupa.
Den e columna LEGAL di e siman aki mi ta bay mas den detaye. Lese den bo www.trempan.com of mi LinkedIn of na www.LincolnGomez.com
#BoColuministaFaborito #BoAbogadoFAborito
