Corte a bay di acuerdo pa Nelson Andrade, Marko Espinoza y Kenneth Rasmijn haci trabou comunitario den caso portofoon di polis
Trabou pa comunidad ta loke cu Hues a bisa e periodistanan Nelson “Speed” Andrade y Marko Espinoza cu nan mester bay haci pa e hecho cu nan a scucha portofoon di Polis y tap loke tabata wordo papia riba e aparatonan policial.
Dialuna mainta hues a cuminsa cu e agente policial Kenneth Rasmijn informand’e cu e ta hay’e culpabel di malversa un portofon policial siendo un funcionario policial. “Bo a haci mal uzo di bo posicion como polis. Un funcionario policial tin un luga special den comunidad,” e hues a bise. Di un persona den un funcion asina ta exigi integridad. Cu e forma di actua aki no solamente Rasmijn a causa daño na ciudadanonan di Aruba y Cuerpo Policial, cu su miembronan mester por atende e casonan aki sin cu nan ta aparece den media.
Pa malversacion di e aparato policial el a haya 240 ora di trabou pa comunidad of 120 dia cera. Hues a tene cuenta cu Cuerpo Policial ta trahando riba e proceso pa dun’e su retiro.
Pa Marko Espinoza a keda proba, mescos cu den e caso di Andrade, opzet heling y tapmento di radio of mobilephone di polis.
E hues a bisa cu Polisnan mester por haci nan trabou den tur siguridad y loke cu nan ta haci of comparti den informacion mester ta sigur cu esaki no ta bay pa prensa. Den e caso di Andrade a tene cuenta cu e tabata esun cu a duna ordo na Espinoza pa baha un aplicacion cu cual por a scucha e combersacionnan di Polis riba e dos aparatonan.
Mirando rol cada uno a dicidi cu Espinoza mester haci 180 ora di trabou pa comunidad of 90 dia cera y pa Andrade 2 luna condicional y 3 aña di prueba; 240 ora di trabou pa comunidad of 120 dia cera si e no cumpli cu e cantidad di oranan.
Tur tres ta bay apela e decision aki di Corte di Prome Instancia cu nan no ta di acuerdo cun’e.
E caso aki a wordo trata dia 24 di juni ultimo unda a bay ampliamente riba inicio di e investigacion aki, cu a wordo cuestiona pa abogadonan di Espinoza y Andrade. A papia cu ta trata aki di simplemente un persecucion politico, mirando tur e miembronan di prensa cu ta scuchando radio di polis di un forma of otro. Ponencia cu Corte o a bay di acuerdo cun’e. Pa corte a hunga un rol importante e siguridad cu Polisnan mester pa haci nan trabou den cu e ta bay pa media.
