Kisas ta pasobra nos ta mas cerca di eleccion, kisas ta pa motibo cu tabatin demasiado fanatico di un solo partido of kisas a sinta na e formula, pero hecho ta cu no tabata facil conduci e di dos debate politico organisa pa Camara di Comercio diahuebs anochi den ballroom di Marriott Resort.
Un di e aspectonan cu sigur a hala masha atencion, tanto pa esunnan eyden mes pero specialmente pa esunnan na cas tabata e publico cu tabata stroba e politiconan. Un cantidad di hende tabata grita, tira palabra, bati man y te hasta “boo” e politiconan durante nan presentacion. Na multiple ocasion e Maestro di Ceremonia, Ruben Trapenberg, a hay’e ta hala atencion di publico pa no stroba e politiconan debati y te hasta siguridad a saca algun fanatico afo pa motibo di mal comportacion.
E formato tambe no tabata na e nivel desea. A permiti preguntanan mucho largo y tin biaha puntrando partidonan nobo cu nunca a goberna riba aspectonan di gobernacion, kitando nan oportunidad pa por sobresali den un contesta basa riba futuro y nan mesun vision.
Riba red social e politiconan participante y e publico a critica e debate di awe, specialmente pa e comportacion di publico. Hopi a bisa cu e debate di hobennan den Cas di Cultura a resulta di nivel mucho mas halto y cu despues di debate mayoria hende no a logra haya contesta riba nan preguntanan.
Locual mas a hala atencion sinembargo tabata e discurso final di e Presidente di Camara di Comercio, Ernst Mohamed. Durante su discurso el a critica e comportacion di publico. Parce cu un hende muhe a interumpi su discurso y por a nota claramente un disgusto y rabia den cara di e Presidente di KVK ora el a para su discurso y dirigi su mes cu bos halto na e señora den publico exigiendo pa e keda keto pasobra henter anochi e tabata papiando.
