Abogado David Kock a comenta cu nan a wordo acerca pa un cliente cu tin un compania di watersport banda di Marriott pa hopi tempo caba, no solamente eynan pero na mas punto na Aruba y a haya notificacion diripente di parti di Taskforce. Esaki tin di haber cu e pelea cu tabata tin riba beach y cu a wordo poni riba tur medio di comunicacion. El a haya un notificacion cu loke tin eynan, no tin permiso y mester ta kita y bay for di eynan.

E cliente a purba, na un manera masha normal prome, pa comunica cu e departamentonan di Gobierno, mustranan tur e permiso y tur cos desde tanto aña cu e ta eynan, pero e no a haya oido.

Despues el a haya notificacion telefonico cu nan ta bay bin pa kita su operacion eynan. El a pidi asistencia legal. A core bay corte, pidi corte solamente un kortgeding, pero un asina yama ordemaatregel, cu bo ta pidi hues pa pendiente e tratamento di e caso y a pone un prohibicion. Hues tambe a pone. No obstante, durante net e momento cu hues a prepara pa haci esey, e departamento di gobierno a bay over pa kita e cosnan na forsa. Awor aki hues a tuma su decision cu esey ta prohibi. Ta prohibi pa kit’e y ta prohibi pa stop e cliente su operacion pendiente tratamento di e caso, contra un multa. Awo Gobierno inecesariamente ta risca pa paga un multa substancial.

 

Demanda

E demanda ta pa sigui opera. E compania aki tin su permisonan di hopi aña caba. Den pasado tabata tin diferente medida cu Gobierno kier a tuma, cu despues a hala atras. A keda periodo cu gobierno lo tabata bezig pa saca cobransa pa e precario cu tin cu paga pa eseynan. Pero esey no a sosode. Na 2016 nan a bolbe cuminsa cun’e. A manda un factura pa e cliente cu no tabata cuadra cu e cantidad di meter cuadra cu e tin. El a bay keha riba esey y e reaccion realmente ta esun actual.

 

Kier paga

E cliente kier paga. Manera semper den pasado el a paga. Ora cu no tabata tin factura, el a paga tambe. E problema no ta e pagamento. Ta djis gobierno mester bin cu un maneho di ala fuersa bin kita cos. Esey ta pa e cliente tabata inaceptabel.

E minister mes ta pone cos riba Facebook cu e ta actua corecto. Eynan ta caminda cu nan ta diferencia di opinion.

 

Kico mas lo sosode

Abogado Kock a splica cu awor aki loke hues a ya a otorga caba, ta un multa di 100 mil florin pa cada dia cu si nan kit’e y di dos si nan stop’e di opera. Gobierno, actuando di e forma aki, ta riesga boetnan halto inecesario.

Den curso di dia lo bay haya sa y esey lo afecta tambe e cantidad di multa cu Gobierno lo bay ta debe.

 

Contacto cu DIP

E cliente di Kock tabata tin contacto cu DIP. E cliente no tabata interesa den haci casonan hudicial. E cliente tabata kier gewoon un solucion. El a kere y a confia cu mustrando tur locual cu e tin, cu esey lo tabata suficiente. P’e mes e no por a kere cu dado momento cu Gobierno a tuma e paso di realmente show up na beach y cuminsa kibra y distrui su operacion.