Aruba ta celebra dia di Himno y Bandera riba dia 18 di maart. Un dia pa reflexiona ki significado nos Himno y Bandera tin pa nos, despues di 38 aña di Status Aparte. “Nos mester reflexiona tambe den ki direccion nos ta desea nos isla bay, pasobra e Arubiano orguyoso parce di no ta conta mas. Esaki ta momento tambe pa nos pone e Arubiano na prome luga y no manera e ta awo, esta na ultimo luga”, asina Eric Ras, lider di Partido CURPA a vocifera.
“A yega e momento pa como pueblo nos lanta para y bisa cu nos por ta chikito pero si respeta. Nos no por permiti pa politiconan gañado sigui destrui nos dushi isla pa nan interes personal. Nos no por permiti cu nos como yui di tera ta bira stranhero riba nos propio isla. Nos mester lucha pa por conserva nos identidad y nos cultura.”
Mas leu e politico a sigui bisa cu “Aruba a gosa di un boom economico y nos di partido Curpa ta contra pa bin mas hotel pa motibo cu nos infrastructura no por carga mas peso. Nos ta hopi agradecido na tur e stranheronan cu a bin establece riba nos isla y cu awe ta forma parti di nos Aruba dushi tera, pero e momento a yega pa cera porta y laga nos organisa nos isla pa bienestar di e yui di tera”.
Hopi hende a bandona nos isla cu cierre di Lago prome cu aña 1986 pero Aruba a lanta para pero pa mal maneho di nos gobernantenan awe nos ta den debe te cu na nos nek. Gobierno di partido MEP for di aña 2004 pa 2009 a subi mercado internacional y a fia 1.4 biyon florin y a claba pueblo cu e BBO cu a nace na december 2008. Aruba no tabatin un mega debe, sino partido MEP a hisa nos debe nacional di 1 biyon florin pa 2.4 biyon florin.
Partido AVP a drenta gobierno y a siña di e mal ehempel di partido MEP y a subi tambe mercado internacional y a fia 1.8 biyon florin y asina hisa nos debe nacional na 4.2 biyon florin. Na aña 2017 partido MEP cu RED Democratico y partido POR a sigui fia placa y nunca a baha gasto. Na aña 2020 gobierno a fia 916 miyon for di Hulanda pero tambe a fia un 500 miyon riba mercado internacional. Despues, na aña 2021 partido RAIZ a declara cu nos no ta nan pero historia lo mustra cu nos no ta miho cu nan tampoco!
Na tur e medidanan gobierno a haya 1.5 biyon florin den caha pero no ta mira unda e placa ta bay. Despues di a core campaña di lo goberna sin medida, awe nos pueblo ta cu yen di medida y nos no ta mira ningun cambio den gobernacion durante e ultimo 24 añanan pasobra e unico cos nos ta mira ta con nos gobernantenan ta sink nos isla. Por traha un grafiek y nos por mira cu un rato ta partido AVP tabata esun cu a aumenta nos debe nacional y si mira e grafiek awor ta partido MEP a aumenta e debe nacional cu mas di 2 biyon florin y sin ningun proyecto. E mas tristo ta cu tur nos empresanan estatal ta den debe!
Nos sa cu e gobierno aki ta difunto caba solamente falta pa e wordo anuncia ki dia e entiero lo tuma luga. Aruba tin mester di hende muhe y hende homber sincero y cu amor pa nos dushi tera pa goberna nos isla. Aruba mester un milager di Dios pa lanta para bek riba pia y ningun di e partidonan politico tradicional tin solucion pa nos isla. Tanto partido MEP como partido AVP no kier hala di nan mal caminda y kier sigui hustifica nan mal gobernacion. Tanto partido AVP como partido MEP a bay contra ley di Dios cu ta haci cu nan ta bao di maldicion.
“Un yiu di Dios sa unda e tin cu sembra su simiya pa e tin cosecha. Un yiu di Dios cu mentalidad di reino nunca por separa estado for di religion pasobra sin Dios den gobierno ta porta habri pa inhusticia. Aruba mester di gobernantenan cu ta bon administrado pa asina nos isla por ta bendiciona. Partido Curpa tin su team. Partido Curpa ta e unico alternativa.
