Ta reina un mal contento basta grandi den Cuerpo Policial di Corsou debi na un caso contro un agente policial, cu durante un asistencia den un caso di ladronicia, a hay’e ta uza su arma reglamentario y di cual despues a entama un caso den su contra.
E scenario aki ta algo cu hopi biaha ta bin dilanti den e trabou diario di polis. De e caso aki, e sospechoso a drenta edificio priva di un compania, na momento cu el a constata presencia di polis, e sospechoso a sali na careda, bula cura y durante e persecucion aki, e agente a los tira herida e sospechoso na su pia. E individuo a declara cu, ningun momento su presencia of intencion na dicho compania tabata di comete un acto di ladronicia.
Remarcabel tabata si cu e persona aki tabata tin handshoen, capuchon y paña preto den su poder. Indignacion a lanta ora cu e hues a indica cu e agente policial a actua robes y no mester a tira e sospechoso. Un consternacion basta serio entre e cuerpo di polis, caminda rumor tin circulando rond, cu ta indica cu e tipo di asistencianan ey, nan lo evito mas cu ta posibel.
Team di maneho di Cuerpo Policial Corsou a tuma nota di e veredicto recien contra di un colega cu a keda sentencia pa un actuacion durante di ehecucion di su trabou, cu na su huicio el a actua conforme di su consenshi.
A base di esey, team di maneho a tuma diferente accion, pa evita mas tanto posibel cu tipo di scenarionan asina’ki lo ripiti den futuro. Team di maneho a acerca tanto Ministerio Publico, “Landsrecherche” como Procurador General, pa yega na un miho sincronisacion y Ministerio Publico a mustra su disponibilidad pa organisa sesionnan di informacion pa trahadonan di Cuerpo Policial, con pa mas miho aplica e instruccion di trabou.
Tambe team di maneho a hiba combersacion cu Minister di Husticia tocante di asistencia huridico na e coleganan den tipo di casonan asina. E procedura tocante di esaki lo hacie mas cla proximamente. Mas leu maneho a haci un apelacion na minister pa bini cu un proposicion di adaptacion den e ley di codigo penal tocante di e sancion cu ta impone na momento cu comete un infraccion a base di e instruccion di trabou.
Team di maneho no ta laga nada impidie di haci su miembronan consciente, cu mirando cu nan ta forma parti di un organisacion cu ta dispone di monopolio di uzo di forsa den un estado di derecho, nan actuacion lo ta investiga y husga di un forma critico door di diferente instancia.
Esaki no mester stroba nan di haci nan trabou na un manera dicidido. E responsabilidad ta sinta tambe cerca team di maneho mes pa zorg pa continuidad di e entrenamentonan integral di e profesion policial y cu tur miembro realmente ta participa na esakinan.
Solamente dor di reforsa e habilidadnan y sigui amplia conocemento, por garantisa cu polis lo haci su trabou di un forma profesional y corecto na proteccion di e comunidad di Corsou.
