Pa ley, dilanti tur cas tin un acera cu ta pertenece na Gobierno di Aruba. Pero na Malmok, un inversionista local a dicidi di renoba y amplia un cas luhoso canto di lama, cu riba su mes ta di aplaudi. Pero hunto cu e inversion DOW of DIP of tur dos, a dicidi di regal’e e acera tambe dilanti su cas, cu permiso pa e hasta cer’e!
Riba red social por lo menos un ciudadano a saca potret y a haci e hazaña aki di DOW publico. Ta bisa DOW pasobra fuentenan ta sigura cu DIP a duna conseho negativo riba e peticion pa uza e tereno publico. Asina mes DOW lo a duna permiso pa “dal bay numa” y pone klinkers riba e acera publico y cera e area cu algun “Amsterdammetjes” cu DOW so tin acceso na dje na Aruba.
Claro cu di un banda ta aplaudi cu nos inversionistanan local, den e caso aki Milton Berlinski, ta opta pa inverti na cas y impulsa nos economia, pero hamas esey por bay asina leu cu nos departamentonan ta opta pa entrega tereno publico tambe na dje den e pakete.
Ing. Marlon Croes, director di DOW tin cuenta y rason pa duna na pueblo aki, pa sa si t’e of ta ing. Haime Croes, director suspendi y bou investigacion na DIP, a comete e otro blunder aki. Pasobra di un banda nan ta busca tur forma pa stroba e proyectonan di Secrets Baby Beach, Embassy Suites by Hilton Aruba Resort y ta nenga di cumpli cu sentencia di hues na Amsterdam Manor pa mal maneho di RWZI, costando pueblo daño y perhuicio, pero na Malmok si ta “fix” un comerciante y regal’e tereno di pueblo.
Minister-president mr. Evelyn Wever-Croes ta responsabel pa maneho di infrastructura di nos pais, bou unda DIP y DOW ta resorta y ta awo politicamente responsabel pa e maneho nobo aki. Si por haci excepcion pa Berlinski, anto e ora Prome Minister mester haci excepcion pa tur otro Rubiano, cu cen of no, cu tambe lo kier embeyece dilanti di nan cas y haya “Amsterdammetjes” pa evita cu niun auto ta para “dilanti nan cas”.
