Aña pasa den luna di mei United Dogs Aruba Foundation tawata tin nan prome campaña di sterilisacion pa cachonan riba caya cu a tuma luga na Carnaval Village.
Cu sosten di gobierno y apoyo di hopi voluntario di Aruba y di exterior a sterilisa aña pasa un totaal di 325 cacho y poeshi cu a wordo recogi for di e barionan pariba di brug.
E aña aki atrobe” United Dogs Aruba Foundation” a haya sosten di gobierno y apoyo di hopi voluntario y comerciante cu a aporta pa por organisa un otro campaña pero e biaha aki den e districto di Noord. For di luna pasa voluntarionan ta trahando y acumulando informacionnan riba e cantidad di bestianan riba caya den e diferente barionnan di Noord.
Cuminsando e weekend aki dia 26-27 y dia 28-29 di mei lo ta sterilisando bestianan na ex edificio di Hulpbestuurkantoor Noord #27 for di 8 di mainta te cu 6 di atardi. Voluntarionan lo ta trahando den e diferente barionan, recogiendo e bestianan y trecenan pa wordo evalua. Prome cu sterilisa, salud di tur bestia ta wordo evalua pa e veterinarionan y despues di operacion tur bestia ta wordo vacuna, ontworm y ta haya un micro-chip. Na momento cu e bestia ta stabil lo e wordo hiba bek na unda ela wordo recogi.
Por medio di e campañanan aki ta trata na reduci e cantidad di bestianan riba caya y tambe contribui na siguridad di comunidad riba caya y den trafico.
Pa mas informacion tocante e projecto aki por tuma contacto cu United Dogs Aruba na email: [email protected] y na telefoon 5651043
