Pa mas o menos 8:30pm a spacha varios unidad di Polis pa un atraco arma na Dior Minimarket situa na Pos Chikito. E prome unidad a tende cu e trahadonan cu seis homber cara tapa a drenta e minimarket, cu machete y otro arma blanco den man y a exigi placa. Parce nan a bay cu e “cash register” completo bou brasa y a perde den e mondi scur eybanda.
Testigonan a conta Polis cu un di e hombernan tabata color cla y e otronan ta color scur. Nan a papia bon papiamento, dunando indicacion cu posiblemente ta hende local mes nan ta y cu conoce e area hopi bon. Nan a perde hopi lihe den e mondi, aunke cu un rato despues a topa cu a cash register bashi laga atras den e mondi scur eybanda.
E ekipo di recherchenan di Atraco Team a presenta mesora pa start un investigacion na e sitio. A pidi presencia tambe di Slachtofferhulp pa brinda asistencia na e victimanan cu a keda atras, bon spanta pa e experiencia amargo cu a pasa aden.