ATIA: Un di dos lockdown lo ta devastador pa Aruba

Aruba Trade & Industry Association (ATIA) tabata un di e entidadnan di gremio comercial cu a participa den e Cumbre cu Gobierno a organisa cu gremionan comercial y sindical riba e asunto di prestamo cu Aruba ta buscando pa haya for di Hulanda.

Michelle de Groot, directora di ATIA, na final a combersa cu 24ora.como pa duna su prome impresion di e presentacion. ATIA ta contento cu Aruba ta den negociacion y ta cerca di yega na un acuerdo. ATIA ta kere den yega na un acuerdo pasobra Aruba mester di dje. Sin e ayudo financiero, comercio di Aruba no ta sobrevivi. Ta importante y urgente pa yega na un acuerdo.

De Groot a bisa cu un di e ayudonan ta subsidio di salario, cu ta un di e mecanismo cu ta wantando mayoria negoshi na Aruba, ya cu no tin flexibilizacion pa restructura un compania. Si subsidio di salario cay afo, hopi compania mes lo bati bancarota. Hopi compania ta depende di e subsidio aworaki.

Flexibilizacion di leynan laboral ta algo cu comercio a bin ta pidiendo pa hopi tempo. No ta realistico pa sigui e operacion cu e mesun cantidad di hende. Te ainda no a haya atenciondi Gobierno riba e asunto aki. Pero eventualmente Gobierno y sindicato lo mira cu no tin otro opcion. Un compania no por mantene tur su trahadonan cu menos entrada. Pasobra a lo largo e ta nifica cu e compania tin cu dal su porta cera y tur hende lo perde trabou.

Un di dos ola di Covid lo pone mas presion riba Aruba, pero un di dos lockdown lo ta devastador pa Aruba, e directora di ATIA a bisa.