Un criminal Venezolano cu a wordo gara na Aruba a wordo manda Hulanda algun tempo atras. E criminal aki hunto cu otro dos a wordo saca di Aruba pa asina garantiza e seguridad den KIA mes. Aki ta trata di e homber Venezolano fam Gonzalez.
E Arestatie Team a handle cu su transporte di Aeropuerto pa KIA y di KIA pa Aeropuerto. El a Sali diadomingo riba avion di KLM pa Hulanda. E homber di fam Gonzalez hunto cu otronan ta envolvi den atraconan pisa riba Aruba. Despues cu na KIA a descubri un plan di huida bon planea, mesora mester a activa pa asina saca tres di nan cu ta e criminalnan mas pisa for di Aruba. E intencion tabata pa rementa cierto area di KIA cu handgranaat y djey logra scapa. Un grupo di Venezuela cual e tabata forma parti di dje mester a bin rescate den prison di Aruba. A descubri e mapa pinta, e mensahenan den telefon cu tabata indica e blindspotnan di prison. Esaki a bira hasta un eye opener pa seguridad di KIA pasobra aki ta trata di un berdad. Mesora a traha riba e blindspotnan cual mester tabata parti di e huida di e presonan criminal. Recherche a haci henter un investigacion den e celularnan haya den nan celda na KIA y asina a descubri e plan peligroso pa logra scapa.
Un di e criminalnan aki a wordo manda Curacao. Dos otro a wordo manda Hulanda bou escolta pisa di Arestatie Team. Mirando cu diabierna tabata tin caso den corte, a trece Gonzalez bek for di Hulanda. E caso ta dos atraco pisa riba Joyerianan na Aruba. Diaranzon el a yega y a wordo hiba KIA. Diadomingo atrobe a mira e movecion riba caya for di KIA pa Aeropuerto y motibo tabata cu e preso peligroso a wordo manda bek Hulanda. Basta atencion di seguridad tanto durante e transporte riba tera pero tambe den avion. Asina por mira cu un preso manera esaki ta costa pais Aruba basta placa. Y awor ta tres den e caso aki ta den exterior despues di descubri e plan macabo di huida unda kier a rementa parti di KIA pa e huida.
