“Mi tin bon noticia pa e pueblo di Aruba. Nos por bisa cu e atraco awe ta practicamente resolvi. Nos a detene e sospechoso algun minuut despues di e robo y nos ta casi 100% sigur cu t’e mes t’esun”, asina Jose Lacle, miho conoci como Lito, a confirma na nos awe tardi laat durante un entrevista exclusivo cu 24ora.com. E vocero di polis tabata contento pa e forma con comunidad a participa hunto cu polis, pa yuda cu informacion pa yega na e sospechoso y asina logra deten’e den algun minuut.
Tabata pa 12:40 pm cu a activa polis pa un caso di atraco na Colombian Emeralds. Polis a yega lihe na e sitio pero ya e ladron a bandona e sitio den un Toyota Tercel color bruin y sin number riba dje. Siguridad di e hotel a sigui’e pero no a gar’e y el a bay den auto. Un rato despues, un patruya a topa cu e homber di fam Sint Jago, di 27 aña di edad y a detene dilanti Kamay # 1 na Noord. E homber aki ta biba na Boroncana, na Noord. Tambe a haya e auto cu el a uza pa scapa na altura di Saliña Cerca.
Na un prome instante e sospechoso a bisa nos cu e no tin nada di haber y cu dentro di poco e lo sali bek di ward’i polis. Aunke esey tabata su idea, e no a resulta. Pasobra polis a reconoc’e y e imagennan di camara a confirma cu ta Sint Jago mes tabata e atracado cu a drenta e joyeria. Riba dje y den su tas a haya evidencianan necesario pa confirma cu e mes tabata den e joyeria na Aruba Marriott Resort & Casino.
