Awe merdia pa 2:15 pm tabatin huma saliendo for di den un cashi coriente na Colegio Arubano situa riba Vondellaan. Mesora empleadonan a uza e aparatonan pa paga candela y a domin’e di biaha. A evacua alumnonan y personal rapidamente, mientras cu a bati alarma na Polis, Brandweer, Elmar y na DTI.
Un investigacion preliminar a indica cu tabatin un corto circuito den e sistema di coriente cu consecuencia cu e cash’i coriente a cuminsa saca hopi huma. Tecniconan di NV Elmar a corigi e fayo mesora pa evita ripiticion y escalacion.
E prome reto tabata pa evacua tur hende for di e area unda tabatin e candela of huma. Alumnonan tur kier yega cerca pa presencia e suceso cu nan propio wowonan, pa cual docentenan y personal di siguridad mester a pone hopi enfasis cu ta un situacion di emergencia y cu mester sali for di cura di scol.
Colegio Arubano a expresa palabranan di gradicimento na tur instancia di emergencia cu a brinda asistencia na momento di e suceso. Scol a informa cu lesnan ta sigui normal mañan diabierna dia 12 di februari 2021.
