Parlamentario drs. Mervin Wyatt-Ras durante conferencia di prensa di fraccion di AVP diamars a trece padilanti su preocupacion pa loke ta trata e sistema di otorga vacunanan. Den esaki e como parlamentario tin pregunta al respecto paso ta indica cu nos hendenan mester inscribi/registra pa medio di nan app. Segun Wyatt-Ras, banda di vacuna dunadonan di cuido ta necesario pa tene cuenta cu e gruponan mas vulnerabel den nos comunidad, manera nos grandinan, esunnan cu malesanan cronico y esunnan riba 60 aña.
Aki mester ta posibel pa garantisa cu e personanan aki sin inscribi via app por acerca nan pa wak si nan lo kier ricibi e vacuna p.e. den consulta cu dokternan di cas, kisas pa medio di nan praktijkondersteuners of den cooperacion cu trahadonan di DVG, cu conoce pashentnan, por acerca esunnan vulnerabel pa puntranan si nan kier vacuna y despues yuda nan registra. Segun Wyatt-Ras tin hopi persona no por/ta sali for di nan hogar pa bay registra y e personanan aki ta core risico di contagia cu e virus door di famia. Pa garantisa mihor efectividad y pa percura cu netamente e personanan cu tin mas mester ta vacuna, ta necesario bon registracion y trabou den cooperacion cu dokternan di cas, praktijkondersteuners y otro stakeholders den cuido. Ta keda natural na decision di e persona en cuestion si e kier vacuna.
Durante e conferencia di prensa di diamars Wyatt-Ras a expresa alabes su preocupacion pa loke ta trata e situacion di likides di AZV y e hecho cu stakeholders a expresa nan preocupacion na parlamento, dia 12 di januari ultimo, pa loke ta trata recorte den cuido, net na e momento aki cu nan ta trahando durante oranan largo y bao presion. Wyatt-Ras te ainda ta warda riba contesta di minister riba su preguntanan.
E parlamentario a haci e preguntanan por escrito, dia 22 di januari 2021, na minister encarga cu salubridad publico, minister Dangui Oduber. E preguntanan ta regarda entradanan di AZV na aña 2019 y 2020, cuanto tabata e entradanan na prima BAZV, gastonan di AZV na 2019 y 2020, ki tipo di cuido a pospone y cual ta e suma mara na esaki? Tambe el a puntra cuanto pashentnan a manda den exterior pa tratamento den 2019 y 2020 y cual ta e suma mara na esaki? Un otro pregunta ta cuanto hende menos a manda na aña 2020 en comparacion cu aña 2019?
Cuanto e likides di e fondo di AZV ta y cuanto ta e defecit y kico lo haci pa minimalisa esaki? A puntra alabes unda tin espacio pa corta e 60 miyon florin cu gobierno kier corta den AZV? A pidi pa gobierno manda e rapport di PWC di 2019 pa parlamento, y pa minister duna claridad encuanto e hecho cu ta bisa cu ta Hulanda a tuma decision pa corta den cuido mientras cu Hulanda ta indica esaki, hasta por escrito, cu ta ministerraad di Aruba mes a dicidi esaki. Alabes a pidi minister pa manda parlamento e carta cu e minister a manda pa Hulanda, den cual e ta pidi pa para cortamento den cuido.
Ta trata pues di 20 pregunta cu te ainda e minister encarga cu salubridad no a contesta parlamento di Aruba. Segun Wyatt-Ras ta parse cu e minister no ta tuma miembronan di parlamento na serio y no ta contesta preguntanan. E minister ta lubida cu e preguntanan cu miembronan di parlamento ta haci den hopi ocasion ta procedente di personanan den nos comunidad cu ta warda un contesta igual cu e parlamentario.
