U.S. Consul Christian Olsen tambe tabata presente den e conferencia di prensa di Refineria di Aruba ora a firma cu Quanten y Eagle LNG. Pero e tabata via e sistema zoom pa motibo cu e no a logra biaha pa Aruba.
Olsen a haya chens pa papia despues di prome minister Wever Croes, y a splica cu ademas di su posicion diplomatico, e ta responsabel tambe pa asuntonan economico pa e area. “Mi a siña conoce Eagle LNG basta bon ultimo lunanan y mi por bisa cu confiansa cu nan tin un bon proposicion pa Aruba. Un proposicion ta encera inversion den infrastructura cu posibelmente por baha e gastonan di energia. Y e ta complementa otro esfuersonan di Aruba, manera energia renovabel. Esaki ta nos meta.”
A bisa tambe cu nan a apoya Eagle LNG den otro paisnan den e region. Pero e compania, cu mester cumpli cu cierto rekisitonan na Merca, tin e apoyo di gobierno Mericano pa nan forma di haci negoshi. “Mi tin confiansa cu e proposicion di nan, tin hopi cos pa ofrece Aruba.”
Pa loke ta e compania Quantem, Consul Olsen a bisa cu esaki tambe ta un compania cu el a conoce y traha cu nan e ultimo seis lunanan. Quantem tambe ta un compania, el a bisa, cu ta cumpli cu eticanan cu Merca ta exigi di companianan.
