Chamaco van der Linde a haya e sorpresa di su bida. Na momento cu el a yega pa ricibi un cuadra cu nan a pinta di dje, a resulta cu tabatin un homenahe sorpresa pa su persona.
Chamaco no a haya nada straño cu el a haya invitacion pa bin tuma un cuadra cu Ivy-Anne Browne a dibuha pe. “Nan a bisami si bisti bachi, mescos cu ora mi ta bay di paranda di Aguinaldo y Dande. Sorpresivamente mi a hayam’i cu e homenahe.
El a keda hopi contento cu e cuadra cu ta uno hopi bibo. “Bo ta sinti e cuadra manera bibo, ta hala rosea. E homenahe ta manera un sapato grandi pa mi, cu no ta mi size. Un homenahe ta algo hopi grandi. Ami ta simplemente un cantado mas, cu ta cana den e rastro di nos grandi. “
Robert Maduro di Departamento di Cultura tabata presente durante e ceremonia y a bisa cu Marciano “Chamaco” van der Linde ta un personahe importante den mundo di Aguinaldo y Dande. Un genero di musica importante den fin di aña, unda e cantante ta hopi un mensahe di positivismo, di alegria. Aguinaldo no ta originario di Aruba pero, el a bisa, cu transcurso di tempo el a bira parti di Aruba su cultura.
Mervin Wyatt Ras, representando Comision Bernadina Growell, a bisa cu tabatin dos talento presente di cada generacion. Ivy-Anne Browne ta e talentosa pintora hoben cu a capta Chamaco, e otro talento, asina bon riba e cuadra. “Nos ta hopi contento cu e reconocemento aki cu a tuma luga na bida. Nos tin cu biba y balora nos cultura y e hendenan cu ta duna nan empuhe na esaki.”
