Diasabra merdia Guarda Nos Costa a controla un cas bao construccion den e area pariba di e casnan di pueblo di Sero Patrishi. Ey a topa un grupo relativamente grandi di trahado. Ora a pidi pa nan mustra un permiso di estadia y di trabou, a resulta cu nan no tin. Esey ta motibo suficiente pa Warda nos Costa bay over na detencion mesora.
No ta un secreto cu Aruba ta yena cu ilegal ultimo añanan, di cual Venezolano ta e grupo mas grandi. Nan ta drenta nos isla como turista pero ta keda atras. Nos mesun hendenan ta duna nan trabou. Tin ta comete crimen tambe pa biba.
Contrario na e cifra di 2 mil ilegal cu Minister Andin Bikker ta mencionando den prensa, Oficina Central di Estadistica ta conta mas o menos 17 mil Venezolano so cu ta permaneciendo ilegal riba nos isla. Nan no a bin den un aña sino den e ultimo 4 añanan. Esaki ta solamente esunnan cu a drenta legal via Migracion. Ainda falta esunnan cu a drenta Aruba ilegal cu boto na costa. Aunke cu ey nan ta yega hopi biaha na dozijn cada biaha.
Awor ta sigui e procedura pa verifica nan status y percura pa deporta nan for di nos isla mas lihe posibel. Warda nos Costa a informa reciemtemente cu den aña 2018 nan a deporta 2000 stranhero bek pa nan pais. Esey ta como 5 ilegal pa dia!
