Den e sala di Censo lo bay tuma luga algun actividad sumamente importante den e proximo dianan, ya caba tin diferente anuncio cu a tuma luga di parti di Conseho Electoral. Pero ta bay tin mas cos cu lo sosode, entre otro e resultado di eleccion diabierna, dia 22 di September.
Sharin Luydens, kende ta hefe di Censo y el a conta algun informacion cu kisas ta importante pa pueblo sa.
Con tur cos ta canando
Trabao tin, el a splica. Ta den pleno preparacion. Ta trahando laat tur e dianan aki. Diasabra tambe nan ta habri tur e stembiljetnan, controla nan, empaketa segun e cantidad pa cada urna. Prepara tur e materialnan y ta riba schedule. Tabata tin un presentacion di con e resultadonan lo drenta dia di votacion, dia 22 di September y ta asina cu ora e urna cera 7’or di anochi, e personanan para ainda na porta di urna, tin derecho di vota ainda. E presidente lo pone un hende su tras pa asina ey e lo ta e ultimo e ora ey. E ora lo bay tin trabaonan administrativo ainda pa haci, cu ta conta cuanto hende a aparece na e urna, via e kiezersregister (registro di votador di cada urna). Tambe nan ta bay wak cuanto stembiljet a wordo duna. Tin un turflijst. E di tres miembro tambe lo wak cuanto stembiljet a wordo hinca den e buzon. Tur e proceso administrativo ta sosode prome. Despues di esey nan tin derecho di un ora di pauze. Si nan kier nan ta tum’e, si nan kier no. Despues ta sigui pa haci e buzon, bolter tur e planianan, despues nan ta shuffle esaki, pasobra Censo no ta parti di e urnana. E urnanan cada un tin cinco miembro cu ta shuffle. Djey nan ta pone pa cada partido, ta pone e votonan di cada lista. Nan ta parti esaki y despues ta bay over na conta. Ora cu caba di haci tur nan trabaonan di conteo y cuanto voto valido tin pa cada partido y cuanto voto invalido tin, cu e resultado ey despues, ta yama Hoofdstembureau. Nan ta tuma e resultado for di e urnanan y despues ta hink’e den un excellsheet y e sheet aki ta wordo proyecta via dos pantaya grandi, den stadhuis pa prensa por transmiti esaki na comunidad.
Resultadonan
Luydens a expresa cu e no lo bay bisa ki ora e resultadonan lo drenta. Ta miho pa duna e urnanan e espacio pa nan conta y haci nan trabao preciso y netjes manera cu ley ta perscribi. No ta yega cera urna y cuminsa conta. Tin procesonan segun ley cu tin cu cana nechi. Procesonan administrativo. Nan tin cu yena e proces verbaal. Tin cu conta den tur trankilidad y ta pidi pa pasenshi. E resultadonan lo drenta.
Restzetel
Ya for di tempran, hendenan ta puntra cuanto voto tin mester pa un asiento. Ta sinti cu esey no por wordo splica ainda, of kisas si, con e tabata den e eleccion anterior. Luydens a splica, tur eleccion, si mira e proyeccionnan, ta bay haya un 84% di votonan valido di e hendenan cu tin derecho di voto. 84% ta voto valido y e porcentahe aki ta coy 70749×84%:21 y bo tin un proyeccion. Pero esey no kiermen cu e lo ta asina. Pasobra por ta asina cu e voto valido e biaha aki ta mas hopi, of e por ta menos. No por bisa cu siguransa, pasobra bo no sa kico lo ta e comportacion di e votador e dia ey, si ta bin hopi mas cu nan ta voto valido of no.
Tanto hende cu tin derecho di voto, si e subi, e kiesdeler tin chens di bira mas halto. Depende di e opkomst. Hopi hende ta puntra, pero kico ta e diferencia entre keda sin bay vota y vota invalido.
E diferencia ta, cu mas hende bin vota, e presencia ta bira mas halto y e kiesdeler tambe. Si bin vota y vota involado, e ora e voto invalido no ta conta den e kiesdeler.
