E siman aki boluntarionan di Luna Foundation a haya yamada cu tin algun cacho canando den nan bisindario causando problema y cu doño di e cacho no ta haci nada pa yuda cu e asunto. Tambe a haya potret di un cacho tefi mara na un mata cu su babynan.
E persona cu a yama no por a subi e propiedad di e cacho cu su puppynan pa cual a bay atende cu e caso aki prome. Pero ta bisa cu nunca nan a spera di topa cu algo asina horibel manera nan a mira. “Nunca nos a mira algo asina horibel. Nada a prepara nos pa loke tabata pasando eynan.”
Un di e boluntarionan, Jacqueline, cu ayudo di otro hende a saca e mama y su yiunan y bay mesora direccion di Contrera Veterinary Clinic na Shaba. E puppynan tabatin mas o menos dies dia bieu y a haya un luga pa wanta nan mientrastanto, completamente deshidratata. Manera Luna Foundation a bisa riba nan pagina: e tipo di crueldad cu bestia ta inaceptabel.
Mas tristo den e caso aki ta cu Luna Foundation su representante Zoe Conijn a dicidi di bay entrega un keho, pero autoridad a nenga di tuma e keho. A pone y laga e cacho aki na cadena te cu el a frega y yega na weso. Un dolor inmenso e cacho aki a pasa den dje.
Recherche a bisa Conijn cu nan no por tuma e keho pasobra nan no sa si ta trata di un actuacion intencional. Sinembargo aki no ta bay pa intencional of no, pero tur hende sa cu si laga un cacho den e estado asina pa hopi tempo sin por move, nada bon ta sali di un situacion asina. E ora ta papia di abuso yy/of negligencia di bestia, cu ta castigabel pa ley.
E cacho tabata mara na un mata sin por a move, sin haya e ayudo for di momento cu e herida mahos na su garganta a habri. Mas tristo e tin 6 puppy. E boluntarionan a yam’e Khalisee cu ta nifica guerero.
