Un otro scol basico a lansa su hardin di alimentacion di agroforesteria, promoviendo asina e integracion di practicanan di agricultura sostenibel den e educacion di nos muchanan. Minister Ursell Arends, encarga cu sector primario, ta sostene scolnan pa inculca balor di agricultura sostenibel den e siguiente generacion y ta felicita Colegio Hilario Angela cu su participacion.
Colegio Hilario Angela ta conoci pa su metodo Montessori cual ta enfoca riba, entre otro, independencia di e muchanan. Alabes e scol ta subraya e importancia di conecta cu naturalesa. Pues, e proyecto di agroforesteria ta haya su luga perfecto na Weg Fontein.
Diasabra 23 di maart 2024, e scol a planta un hardin di alimentacion cu sosten di Minister Ursell Arends, Santa Rosa, maestronan, studiantenan y miembronan di comunidad. Tur hunto a uni forsa, demostrando cu invertiendo den nos muchanan ta un inversion directo den e futuro di nos Pais.
E iniciativa di agroforesteria den e scolnan primario lo sigui cu mas dianan di plantacion, e proximo ta planea pa diasabra 20 di april 2024 na St Paulus Basisschool, cuminsando 7:00 am te cu 1:00pm.
E hardin di alimentacion na Colegio Hilario Angela ta un testimonio di e dedicacion y esfuerso colectivo. Minister Ursell Arends ta extende un palabra di gradicimento na Santa Rosa, Living Soil, y specialmente na Colegio Hilario Angela, esta e directora Conny Aventurin como tambe e coordinador di e proyecto, Shaneila Geerman. Danki pa forma parti di un otro diasabra fructifero contribuyendo na e mision pa mehora e nivel di siguridad di alimentacion na Aruba.
