Dia 7 di mei 2024 Fundacion F.A.D.A cu aporte di Aruba Bank y Piso Tres lo organisa pa prome biaha un conferencia educativo “Mind Matters Conference”, cu ta un conferencia riba e topico di Salud Mental. Cu e conferencia aki, Fundacion Anti Droga Aruba (F.A.D.A) kier ofrece e comunidad di Aruba e oportunidad di atende un evento unda cu oradornan local y internacional lo presenta topico di actualidad pa cu bienestar di salud mental.
F.A.D.A ta traha ariba e tereno di prevencion y conscientisacion. Nan mision ta pa lanta y lidera un comunidad saludabel den e prevencion di e uzo y abuso di diferente substancia y promove e bienestar di salud mental y pa apoya y educa e hobennan, nan famia y e comunidad pa preveni e uzo di droga legal of ilegal. Desde 2022 F.A.D.A. ta enfocando su mes mas riba salud mental, y recientemente a lansa su tarea mas nobo cu ta enfoca riba prevencion di desbalansa cu salud mental a lanta diferente jingle, video, campaña y contento di por menciona cu nan ta lansa nos prome conferencia di salud mental aki na Aruba.
E obhetivo di e conferencia ta pa provee comunidad henter, specialmente e mayor(nan), educador(nan), coach(nan), dunado di trabou, empleado informacion riba salud mental, un topico taboo den nos comunidad pero uno sumamente importante y necesario. Un conferencia unda orador local y internacional lo provee diferente herment y informacion importante basa riba nan estudio y experiencia.
E anochi lo ta guia p’e moderado Mingli Chung, kende ta un hoben dinamico, entrepreneur den e ramo di “Trauma Informed Leadership & Business Coaching.” Su experiencia riba e tereno di ta trauma sigur lo yuda trece pregunta y splicacion nan clave durante e anochi aki.
Como orador local nos tin Dorilis Werleman, psicologo y directora di Psycoach. Dorilis tambe a lidera e implementacion di Codigo di Proteccion den e sector hudicial. Dorilis ta conoci pa su experto cu hoben, adulto, pareha, famia, servicio nan social, divorcio y mucho mas. E anochi aki Dorilis lo bay elabora riba diferente ayudo nan cu tin, ki momento pa haci uzo di ki tipo di yudansa, por ehempel life coach, psicologo, trahado social etc. y tambe lo bay splica tur locual ta e diferencia di desbalansa den salud mental y mental disorder.
Como orador internacional, biniendo for di Bonaire tin Dekorandus, Marcelino Mauricio. Marcelino tin hopi aña ta dedica su mes na cuido y prevencion di hende cu problema cu salud mental. Na 2012 el a lanta y dirigi e Fundacion Mental Health Caribbean.Marcelino tin hopi aña yudando e paisnan den Caribe y na Hulanda como orador, consehero y mucho mas. Banda di su estudio, Marcelino mes a experiencia reto cu su salud mental y lo bay elabora mas riba e tema aki. Di con e ta cuminsa, kico ta e señal nan, kico pa haci ora experiencia esaki nan den bo mes of den sernan keri. Pasobra mayoria hende tende e palabra salud mental ta pensa directamente riba suicidio pero ta importante pa educa nos mes na kico tur e paso nan ta prome cu yega eynan, con pa yuda y reconoce reto nan nos mes, pa un familiar, colega amigo, trahado.
E conferencia lo tuma luga diamars, 7 di mei, na Cas di Cultura. E conferencia lo ta di 6:00 pa 9:00 pm. For di 5:00 pm porta lo habri unda tambe por probecha di tur information booth. Ta asina cu prome y despues di e conferencia lo tin diferente compania, organisacion y instancia presente den e hal, e asina yama “Mind Matters Info Foyer”, pa asina brinda tur presente cu informacion valioso, tipo di servicio, actividad y hasta special. Lo bay rifa diferente premio nan tambe por pensa riba life coach sessions, spa, yoga giftcard, mindfulness practices y hopi mas!
Pa ticket lo por cumpra via Pay.aw, of personal na F.A.D.A. of Cas di Cultura. E organisadonan a sigura pa pone un prijs accesibel pa un y tur. E ta solamente 35 florin. E prijs sigur ta pa asina nos por tin un sala yen cu maestro, mayor, empleado, dunado di trabou y comunidad henter.
Cu e conferencia aki, e organisadonan kier ofrece e comunidad di Aruba, e oportunidad di atende e prome Conferencia di Salud Mental. E conferencia aki ta organisa pa F.A.D.A. hunto cu Aruba Bank y Tres Piso. Un evento unda cu e oradornan local y internacional lo presenta e topiconan di actualidad pa cu e bienestar di salud mental. A bira ora Aruba!
