E aña aki COMPRA ta celebra 75 aña sirbiendo nos comunidad como distribuidor. Parti esencial di nan operacion semper ta pa duna bek na comunidad y apoya instancianan cu mas mester di dje. Pa sigui contribui na comunidad, e biaha aki a colabora cu empresario y pintor Franklyn Bareño, cu su bunita iniciativa pa pinta diferente cuadra inspira pa naturalesa y arkitectura di Aruba y recauda fondo pa instancianan local cu tin un impacto positivo den nos comunidad.
COMPRA LTD. a cumpra un collecion di 6 cuadra for di Fanky Bareño, di cual tur fondo a bay directamente pa Stichting Casa Cuna Progreso. E donacion aki ta special pa Managing Director di Compra, Hubert Dirks, mirando cu su tanta, Maria Louisa Koolman, tabata e prome director di Stichting Casa Cuna progreso.
Representatenan di Stichting Casa Cuna Progreso a bishita oficinanan di COMPRA pa ricibi e donacion oficialmente y tambe pa comparti cu gerencia di COMPRA mas di nan trabou, esfuerso y dedicacion pa bienestar di muchanan na Aruba.
Casa Cuna Progreso ta un internaat pa mucha entre 0-8 aña cu ta opera na Aruba pa mas di 66 aña. Nan meta ta pa brinda bon cuido, atencion positivo, amor y structura na muchanan cu pa un of otro motibo no por biba na nan cas. Nan ta duna sosten temporal door di guia e muchanan y mayornan, famia, cu e meta pa e mucha por bolbe bek den un ambiente familiar y saludabel.
Casa Cuna ta depende riba contribucion publico y priva pa por opera.
