Compara cu luna di maart: Indice di prijs di consumo a subi

E CPI pa luna di april 2022 ta 102.16, loke ta representa un subida di 0.7% compara cu e indice di maart 2022 (101.47) y acumulando un subida di 1.5% te cu na april di e aña aki.  E cambio di e CPI pa e ultimo diesdos (12) lunanan (april 2021 te cu april 2022) ta 4.7%, un subida di 5.1 punto di porcentahe (ppt) compara cu e periodo corespondiente di aña pasa (-0.4%). 

E promedio anual di e tasa di inflacion pa e periodo di april 2021 te cu april 2022 ta 2.6%, un subida di 4.9 ppt compara cu e -2.3% registra den e periodo di april 2020 te cu april 2021. 

Durante e luna aki, cuater (4) di e diesdos (12) sectornan a registra subida di prijs. E subidanan cu tabatin e mayor efecto riba e CPI a wordo registra pa e sectornan di “Transporte” (7.5%) y  “Cuminda y bebida no-alcoholico” (1.5%), causando un efecto di 1.04 y 0.17 ppt,  respectivamente. E subidanan den e sectornan restante a contribui cu un efecto di 0.03 ppt riba  e CPI di april 2022. 

E subidanan aki a wordo contraresta parcialmente door di principalmente caida den e indicenan di e sectornan di “Paña y sapato” (-9.0%) y “Mobilario” (-1.7%) cu a contribui cu un efecto di  -0.25 y -0.16 ppt riba e CPI di april 2022. E caida den e sector restante a contribui cu un efecto  di -0.03 ppt riba e CPI di april 2022. 

E subida den e sector di “Transporte” ta causa door di principalmente un subida den e  categoria “Gasto relaciona cu uzo di vehiculo di transporte personal” (7.7%), causando un efecto di 0.68 ppt, respectivamente. E subida den e sector di “Cuminda y bebida no-alcoholico” a ta  causa principalmente door di un subida di 1.7% den e categoria “Cuminda”, causando un efecto  di 0.16 ppt. 

E caida den e sector di “Paña y sapato” a ta causa principalmente door di un caida den e  categoria “Paña ” (-9.0%), causando un efecto di -0.19 ppt. E caida den e sector di “Mobilario” ta causa principalmente door di un caida di 8.0% den e categoria “Aparato pa uzo  domestico”, causando un efecto di -0.21 ppt. 

Canasta di consumo 

E canasta di consumo di e CPI ta consisti di 408 bienes y servicionan. Compara cu maart 2022,  44.6% di e bienes y servicionan aki a conoce un aumento di prijs causando un efecto di 1.84 ppt,  mientras cu 40.4% ta mustra un caida di prijs, cu a contribui cu un efecto di -1.17 ppt y pa e restante 15.0% no tawata tin cambio den prijs. Prijsnan di bienes a subi cu 0.8% y a causa un  efecto di 0.49 ppt. Prijsnan di servicionan a conoce un subida di 0.5% y a causa un efecto di 0.19 ppt riba CPI di april 2022.

Core inflation 

E CPIC (core inflation) – CPI excluyendo e efecto di energia y cuminda – a registra na april 2022 un subida di 1.2%. E indice di energia – cu ta consisti di e productonan: electricidad, awa, gasolin  y diesel a registra un subida di 8.8%. E indice di cuminda a registra un subida di 3.0%. 

Bestaansminimum 

E bestaansminimum pa un hogar consistiendo di dos (2) adulto y dos (2) mucha (edad 0-14 aña)  na april 2022 ta Afl. 5,003, un subida di Afl. 253 compara cu April 2021 (Afl. 4.750). E  bestaansminimum pa un hogar di un (1) adulto ta Afl. 2,382, un subida di Afl. 120 compara cu  April 2021 (Afl. 2.262). 

Cambio di prijs di petroleo, utilidad, gasolin y  diesel na April 2022 

Prijs di utilidad (electricidad y awa), gasolin y diesel ta wordo determina primordialmente door di e prijs internacional di  petroleo. Na april 2022 e prijs promedio pa bari di petroleo  (US$ 102.29) a conoce un caida di US$ 6.29 (-5.8%) compara cu maart 2022 (US$ 108.58). 

Prijs di electricidad y di awa no a cambia compara cu maart 2022. Consecuentemente, e prijs promedio di electricidad pa vivienda a keda Afl. 240.09, mientras cu e prijs promedio di  awa pa vivienda a keda Afl. 137.05. 

Prijs di gasolin a registra un subida di Afl. 30.00 cent (11.5%) na april 2022 y a causa un efecto di 0.61 ppt riba e CPI. Prijs di diesel a registra un subida di Afl. 45.70 cent (20.0%) na april 2022 y a causa un efecto di 0.07 ppt riba e CPI. 

Na april 2022, utilidad, gasolin y diesel como grupo, tabatin un subida di prijs di 4.1% compara cu maart 2022 y hunto tabatin un influencia di 0.68 ppt riba e CPI, mientras cu e restante 404 bienes y servicio hunto, no a cambia y no tawata  tin efecto riba e CPI.

Cambio di prijs di Cuminda y servicio di catering na April 2022 

E indice di “Cuminda & servicio di catering” a registra un  subida di 1.2% na april 2022, despues di un subida di 0.6% na  maart 2022. E indice di “Cuminda na cas” (1.5%) a registra un  subida, unda nuebe (9) di e diesun (11) indicenan di e  gruponan di cuminda na cas a subi na april 2022. E indice di  “Pan y otro productonan di grano” a conoce e subida di mas  grandi (3.9%) na april 2022. Otro subidanan significante a  wordo registra den e indicenan di “Pisca y otro cuminda di  lama” (3.7%), “Lechi, keshi y webo” (2.7%), “Berdura” (2.5%) y “Sucu, jam y otro tipo di cos dushi” (1.8%). 

E indicenan di “Batata, yuca y batata dushi” (-2.8%) y “Fruta”  (-0.7%) a registra e unico caidanan na april 2022. 

Den e ultimo diesdos (12) lunanan e indice di “Cuminda &  servicio di catering” a subi cu 7.5%. E indice di “Cuminda na  cas” a conoce un subida di 8.3%, unda tur e diesun (11)  indicenan di e gruponan di cuminda na cas a subi durante e  ultimo aña. E indice di “Azeta y otro productonan traha di vet”  a subi cu 21.1%, e subida di mas grandi entre e gruponan di  cuminda na cas. Otro subidanan significante a wordo registra  den e indicenan di “Fruta” (11.8%), “Carni” (9.3%) “Pan y otro  productonan di grano” (9.1%) y “Pisca y otro cuminda di  lama” (8.6%). 

E indice di “Cuminda pafo di cas” a subi cu 0.5% na April 2022 y a registra un subida di 5.5% den e ultimo diesdos (12) lunanan.