Despues cu pa dos aña no tabata por a organis’e door di e situacion mundial di pandemia, e dia a yega. Aruba Hi- Winds t’ey bek. E gran apertura di e evento deportivo lo tuma luga dia 25 di mei riba e beach na Fishermans’ Huts cu musica ‘bibo’. Final lo ta dia 30 di mei cu entregamento di premio na Paseo Herencia.
C’un directiva y miembronan di comitiva nobo, algun tempo atras a cuminsa di manera entusiasta na e preparacionnan di e di 34 edicion. E patrocinadonan principal di e evento ta Successfully y Vader Piet Windpark.
E aña, e evento cu ta existi desde 19686, ta consisti di un cooperacion entre Aruba Hi-Winds, IFCA (International Funboard Class Associaton), Windracers Club Aruba, Sunfish Club, FX Sport y Hubada Cycling team, cual nan obhetivo mutuo ta pa promove practica di deporte na Aruba. IFCA, como miembro di World Sailing, ta capacita pa entrega premionan mundial y continental.
Lo wak hopi careda y lo por sigui e caredanan di distancia largo riba beach y tambe e competencianan riba awa via live streaming riba un pantaya grandi.
Windsurf
For di diahuebs te cu diadomingo tin e Pan American y South Americna Championship, New Kids y Superkids riba diasabra y diadomingo y e caredanan di distancia largo lo tuma luga riba diadomingo. E kitesurfer mundialmente conoci Lasse Walker tambe lo participa na e evento e aña aki, hunto cu e campeon mundial local Sarah-Quita Offringa cu lo bin for di Europa specialmente pa participa na e evento aki.
Den transcurso di e añanan e evento a crece for di solamente competencia di windsurf pa un evento unda cu mas sorto di deporte, entre otro kitesurfen, kitefoiling, paddleboarding y te hasta careda di mountainbike.
Kite
Desde diabierna te cu diadomingo lo tuma luga caredanan di kiteboarding, kitefoil y wingfoil di distancia largo y Big Air (pa e careda mas halto) lo ta dia 29 di mei. E ganadonan por spera premionan den efectivo y e ganado di Big Air lo ricibi un regalo grandi di Sky Dive Aruba.
Careda di mountainbike
Pa aficionadonan di mountainbike diasabra lo tin un strider race pa esunnan di mas chikito y riba diadomingo mainta trempan lo tin un careda di mountainbike den naturalesa.
Sunfish
Tambe Sunfish Club Aruba ta forma parti di Aruba Hi-Winds e aña aki y nan caredanan lo tuma luga diasabra mainta riba e beach di Surfside.
Ademas di careda, lo tin tambe un sesion di yoga, un show di moda, varios garoshi di cuminda, foodcourt y tur dia lo tin un happy hour y un live DJ como tambe banda, riba e conocido Fishermans’ Hut.
Tur hende ta keda cordialmente invita pa bin apoya nos atletanan di semper, pero tambe nos atletanan nobo y celebra y apoya e regreso di e evento deportivo aki.Pa mas informacion subi riba www.arubahiwinds.com
