Iglesianan Cristian di Aruba a tene un manifestacion dilanti Bestuurskantoor pa asina mustra nan mal contento den henter e situacion di matrimonio di mesun sexo. Tambe nan a colecta hopi firma pa pidi gobierno bay casacion y kier a mustra nan disgusto riba e situacion di diaranson.
Frank Daal, pastoor di Good Samaritan Church, a splica cu nan a presenta pa asina trece dilanti algun punto. E prome punto tabata riba e resultado dje accion di firma obteni cu ta mas di 14000, e di dos punto ta di cassatie cual nan no a tende nada ainda. E ultimo punto ta di diaranson ultimo, unda a yega un barco di gay. El a expresa cu tur hende ta disgusta di loke a pasa diaranson, pero ningun persona a bin afo pa disculpa of para responsabel. Nan no a convoca un marcha of manifestacion, pero simplemente a bin dilanti cu tur e puntonan.
Nan a logra acumula un total di 14420 firma y e ta un acumulacion online como fisico. Nan no a troce brasa di ningun persona pa firma. E ta haya cu e pueblo di Aruba ta moral, ta cristian y kier mira p’e pais aki ta goberna cu principio di Dios. Nan no ta aproba manera di biba cu no ta cana caminda di Dios.
Prome minister a pidi e representantenan di e comision pa un encuentro. Asina ey e por a scucha nan preocupacion.
Roberto Gracia, pastoor di Iglesia Odres Nuevos, a indica cu nan tabatin un meta na nan presencia dilanti Bestuurskantoor. El a cu un grupo chikito a presenta despues cu nan ta recolectando firma pa pidi gobierno bay casacion. Tambe nan ta rabia y tristo pa loke a pasa diaranson, unda hende tabatin relacion sexual publicamente y esaki a bay viral. Pero tambe cu por a mira e grupo di personanan aki cana semi of casi sunu.