Creatividad combina cu fantasia y color a resalta den e Parada Escolar Oranjestad

Diabierna mainta a tuma luga Parada Escolar, unda cu e scolnan cu ta resorta bou di Dienst Publieke Scholen di Oranjestad a uni hunto pa asina, di un manera creativo, tene un mini carnaval cu e muchanan. 

Un parada cu a sali for di Veld di Cricket den Vondellaan, bin noord den Caya G.F. (Betico) Croes, bay abou drenta De La Sallestraat, lora drenta Kamerling Onnestraat pa el a bay caba na Veld di RCA.

E parada a habri cu e grupo di Scol Paso pa Futuro cu a bin cu e tema Painting the Difference. Nan a bin cu roadpiece cu ta representa e materialnan di un pintor. Por a wak e diferente verfnan, e stand cu e pintor ta uza pa asina pone su canva ariba dje, como tambe su diferente kwashinan cu e ta uza. E muchanan tambe tabata bisti na e diferente color, por pensa aki riba geel, berde, blauw y cora. Sigur hopi colorido. Un bes mas ta demostra cu no mester di ta luhoso pa subi c’un grupo riba caminda.

Grupo number dos tabata Reina Beatrix School. Tema di e scol aki tabata Fantasia di Sombre. Un biaha mas a demostra con algo simpel por resulta den creatividad riba caya. E muchanan sombre tabata basa riba nan mesun fantasia y creatividad. Un ambiente sigur cu e muchanan aki a trece den e cayanan di Oranjestad. E diferente juffrouw y meneernan di scol tabata anima e muchanan riba caya. Bunita!

Siguientemente a haya Prinses Amalia Basischool cu a presenta Fantasia di Encanto. Algo cu ta biba cu ta biba den cada mucha! E muchanan tabata bisti n’e diferente personahenan di Encanto. Manera Bruno, Dolores, Mirabel, ISabela, Antonio y Pepa. Un pelicula cu sigur nos muchanan a wak mas di un biaha.

E mas chikitonan, pero cu no a keda atras den ambiente, fantasia, alegria y color tabata e muchanan di Arco Iris Kleuterschool, cu a cera e parada. Door cu na januari cu februari nan a trata e materia di circo den klas, a dicidi di bin cu e tema Circo riba Pia! 

Loke por siña di e parada aki ta cu no mester di luho pa forma un grupo, pero loke mester ta fantasia y creatividad. E muchanan a gosa hopi. 

Pero tambe, musica no tabata falta! E parada tabata compaña pa Buleria, cu a pone grandi y chikito baila y gosa sin fin. 

Despues di dos aña cu no tabata tin parada, e muchanan, nos futuro, esunnan cu tin di bay carga nos Carnaval den futuro, a gosa un bol. 

Sigur, palabra di pabien ta bay pa Dienst Publieke Scholen y Prinses Amalia Basisschool cu a bin cu tremendo iniciativa pa hunto organisa un parada escolar. 

Den e parada por a nota presencia di e docente-, mayornan y polisnan cu hunto a zorg pa tur cos cana netjes pa nos muchanan.

Nos muchanan ta nos futuro di mañan.