E ultimo 3 simannan tras di lomba yena cu incertidumbre y ansiedad ta pone nos tur como un comunidad reflexiona ariba con conecta nos tur ta cu otro y di ki forma nos escogencia di awe por determina nos realidad di mañan.
Apesar cu desde 13 di maart tur cos a cambia na Aruba pa motibo di COVID-19, e team completo di educador y profesionalnan dedica y comprometi di Colegio EPI na tur nivel no a para keto y a bin ta enfocando tur nan esfuerso pa asina mantene proceso di enseñansa como un prioridad.
Docentenan a wordo pidi den un tempo cortico y inespera pa cambia nan forma di custumber di duna les pa un forma nobo. E personal di apoyo a wordo pidi pa duna mas di locual nan tabata duna caba y bira mas creativo. E berdad ta cu niun hende tin un formula, un manual ni tampoco e experiencia di con ta anda cu e crisis actual, pero e team di EPI ta dispuesto pa duna miho di nan mes y siña di e proceso. “Unico cu nos por pidi comunidad pa haci ta keda mustra e aprecio y gratitud na tur e profesionalnan den educacion, sea nan ta docente of ta traha den administracion of operacion cu apesar di e desafionan presenta, ta sigui cu alma, curason y sacrificionan personal pa duna lo miho di nan mes pa salvaguardia enseñansa,” un relato di prensa di e instituto educativo aki ta bisa.
Desde siman pasa na Colegio EPI ta bezig caba cu e transicion di e procesonan actual pa un enfoke nobo di enseñansa ariba distancia door di entre otro lesnan virtual. Pa e motibo aki EPI kier informa comunidad, en special su studiantenan cu varios les a cuminsa draai caba di un forma virtual na unidadnan Hospitalidad y Turismo, Salubridad y Servicio, Ciencia y Tecnologia y Economia. “Nos meta ta pa logra den un tempo cortico tin e proceso di transicion pa lesnan virtual completa te unda cu ta posibel, y bin cu solucion innovativo unda cu esaki no ta posibel.”
Pa studiantenan cu ainda no a tende di nan mentor of di scol esaki por ta pa motibo cu e informacion cu tin aworaki den e sistema no ta cuadra cu e realidad. “Nos ta recomenda e grupo aki pa tuma contacto lo mas pronto posibel sea cu nan mentor of un unit manager na Colegio EPI.” E informacion di ki forma pa contact scol directo ta como lo siguiente:
Unidad Ciencia y Tecnologia
e-mail: [email protected], [email protected] ,
[email protected] , [email protected]
Unidad Economia
e-mail: [email protected] of [email protected]
Unidad Hospitalidad y Turismo
e-mail : [email protected] of [email protected]
Unidad Salubridad y Servicio
e-mail: [email protected] of [email protected]
Pa informacion tocante casonan di Intern Beroep
[email protected] of [email protected]
Regularmente lo pone updates di informacion di scol riba nos pagina di Facebook como tambe lo manda informacion via e-mail di tur studiante. Pa preguntanan relaciona cu tecnologia y conexion semper por tuma contacto cu nos helpdesk door di manda un e-mail na [email protected]. Tambe e salud social, mental y fisico di nos studiantenan ta keda importante y pa cu esaki nos trahadornan social ta keda disponibel pa yuda na tur momento.
Tur studiante por libremente manda un e-mail na nos dos trahadornan social cu ta [email protected] of [email protected] y nan lo tuma contacto directo cu e studiante pa traha un cita of mira unda por duna apoyo.
E ta keda dificil di berdad pa no ta fisicamente presente riba nos campus y interactua cu colega y amigonan. Pero nos mester corda cu nos ta haciendo esaki pa proteha henter nos comunidad pa e peliger di COVID-19. Nos ta gradici un y tur pa nan pasenshi y comprension den e temporada aki y nos ta convenci cu hunto nos ta siña con pa adapta na e realidad nobo di social distancing, pero cu un sentido mas profundo di cuida otro.
