Un team di Departamento di Agricultura, Cria y Pesca conoci como Santa Rosa, a haci un bishita na e scol ganado di e proyecto “Hofi Amistad” esta Colegio Conrado Coronel. Durante e mainta aki, Minister Chris Romero, encarga cu Sector Primario a expresa palabranan di motivacion y elegio na tanto e studiantenan como e Docentenan. Minister Romero, na mes momento a concientisa e muchanan encuanto di e importancia di siguridad di cuminda y e motibo pa cual agricultura ta asina importante. Door di planta nos ta come mas saludabel.
E mainta a continua cu un presentacion encuanto di plantamento basico, duna pa Ludwig Rasmijn, pa asina e alumnonan ta bon prepara pa por planta mata den e bakinan di nan “Hofi Amistad” y tambe pa nan sa con pa cuida nan. E presentacion tabata bon detaya pa e muchanan tene cuenta, kico tur pa haci na momento di planta mata den tera of den baki.
Despues di e presentacion Minister Chris Romero, Nathalie Maduro, Director di Santa Rosa, docente, y alumnonan a inaugura e “Hofi Amistad” oficialmente cu e nomber bunita graba riba un palo.
Despues di e inauguracion a continua pa guia e muchanan con exactamente ta transplanta un mata chikito cu tabata den un pochi, pa e bakinan traha y aloca den e “Hofi Amistad”. E alumnonan di Colegio Conrado Coronel di 5de klas tabata entusiasma y cu hopi alegria a planta nan matanan cu nan mes a planta.
