Caribbean Mercantile Bank N.V. ta orguyoso di tin e privilegio di sirbi e comunidad di Aruba pa 58 aña. Durante e tempo aki, nos a traha hunto y cerca di nos clientenan tanto den tempo bon como den tempo malo. E fundeshi di nos banco a wordo construi riba relacionnan firme, pesey e ta haci’e particularmente dificil pa nos pa enfrenta nos reto di mas grandi te awor.
CMB a yega di pasa den varios etapa di cambio, pero den e ultimo paar di aña nos a bin ta experencia con cambionan den e industria bancario a acelera mucho mas rapido y cu mucho mas consecuencia di loke nos por a anticipa. E cambionan den e expectativanan di nos clientenan y con nan kier wordo atendi, eficiencianan operacional stimula pa digitalisacion, y awor nabegando door di un pandemia cu un efecto lamentabel pa nos tur.
E forma con e industria a evoluciona tabatin un impacto grandi riba con nos ta haci negoshi dia pa dia y tambe riba nos operacion. E desafio di mas grandi cu nos ta enfrenta na e momento aki ta e exceso di capacidad; con esaki ta afecta e factibilidad di banco riba termino largo y e realidad cu pa nos por continua e lo lamentablemente rekeri terminacion di empleo di nos rescurso di mas importante, esta nos empleadonan.
E number total di staff cu a wordo ofreci un acuerdo mutuo di terminacion di empleo ta 26. Despues di consulta cu Federacion di Trahadornan di Aruba (FTA) a keda acorda un forma di proceder cu e impacto minimo riba e empleadonan, mientras alaves ta sigura cu e banco ta keda factibel a largo plaso.
Nos lo kier duna siguransa cu nos empleadonan cu lo wordo impacta lo wordo trata cu dignidad y respet, y naturalmente nos ta gradici nan pa nan añanan di dedicacion y servicio. Un proceso similar di ahustacion a wordo implementa tambe riba e otro islanan unda cu Maduro & Curiel’s Bank (MCB) ta opera.
Como bo banco, nos tin e deber di cuida y responsabilisa nos mes pa cu nos empleadonan, nos clientenan y nos comunidad pa sigura cu banco ta keda fuerte y cu nos por logra supera e crisis cu nos ta aden. Temponan manera esnan cu nos ta pasando aden lamentablemente ta trece cu ne cu mester tuma decisionnan cu a lo largo lo afecta nos tur. Aunque e ta un tarea cu no ta agradabel, e ta uno cu ta necesario pa asina nos por garantisa e stabilidad financiero a largo plaso y sigui brinda nos clientenan e nivel halto di servicio y confiansa cu nan merece.
CMB lo kier gradici tur su clientenan pa nan apoyo y pasenshi durante e tempo sumamente dificil aki. E decisionnan cu nos ta tuma awe ta forma un di e desafionan di mas grandi cu nos a yega di encontra.
Na henter nos comunidad, por fabor keda safe y proteha bo sernan keri mientras cu nos ta enfoca riba un miho mañan.
