Cerca di 580 detenido y un morto den un anochi di violencia extremo na Chile

Un morto den un tiroteo y cerca di 580 detenido tabata e balans di un anochi di violencia extremo na Chile, caminda cu a kima dos misa di e capital y a registra sakeo y baricada den henter e pais durante e conmemoracion di e prome aniversario di e asina yama “estallido social.”

E subsecretario di Interior, Juan Francisco Galli, a informa un persona tabata tin herida di bala na Pedro Aguirre Cerda, den e bario di Santiago, durante un atake na un vehiculo policial y a fayece despues na hospital, un incidente cu ainda ta “bao di investigacion.”

“Mas durante anochi ya no tabata tin manifestacion, ya no a keda hende riba Plaza Italia, pero si a mantene  hechonan grave di violencia,” Galli a indica.

Di e total di detenido, a aresta 287 persona na Santiago, entre nan un militar di Armada cu, segun e institucion, “tabata riba su dia liber” ora cu a detene despues di a participa den e incidente.

Tambe a registra mas di 20 sakeo, daño riba mas di 50 vehiculo policial y un total di 116 agente a resulta herida, seis di nan di gravedad, segun e balans oficial.

Onderschrift: Agentenan policial di Investigacion di Chile (PDI) trahando cerca di e parokia distrui di Asuncion na Santiago (Chile). EFE/Alberto Valdés