Diaranson esunnan cu kier participa den e Festival di Tumba 52 a inscribi, pero cinco banda a opta pa no participa. Ta trata di e bandanan Buleria, DLS, Suona, Shine Music y 1 OAK. Pero nan a uni y den un conferencia di prensa a informa e motibonan pa kico nan no ta participa den e Festival di Tumba 52.
Nan a manda un carta pa e organisacion SMAC, unda a informa cu nan no ta participa n’e festival. Tambe a trece dilanti nan puntonan di preocupacion pa e organisamento di e Festival di Tumba. Un di e puntonan treci dilanti ta cu nan kier engrandece e festival di tumba. Nan a reuni aña pasa na november cu SMAC pa atende diferente punto, pero te cu e fecha di dia 10 di januari, nan no a haya notulen di e reunion.
Segun Nicole Martina, representante di Buleria, a indica cu den e carta tambe a pone cu SMAC a yama un reunion di urgencia dia 9 di januari riba peticion di e musiconan pa haya un update riba e festival. E musiconan aki tabata a expresa nan preocupacion riba e nivel y interes di organisacion di e festival. Durante e reunion ey a informa esunnan presente riba e premio y tambe a crea premio pa categoria di tumba loco. Si no tabata p’e musiconan mes, e informacionnan aki no lo tabata conoci.
Un otro punto tabata riba promocion p’e festival aki, mirando cu esey falta. Durante e reunion e bandanan a haya sa cu e flyer di promove e evento lo sali dia 14 di januari. Sinembargo, nan ta haya cu esaki ta poco tempo pa promove y engrandece e Festival di Tumba.
Banda y participante riba un solo linea
E cinco bandanan aki a uni pa asina trece dilanti nan preocupacion di loke ta pasando. Martina a expresa cu nan ta gradici e presidente di SMAC y su team pa e esfuerso hinca den e festival di aña pasa pa esaki tabata exitoso. Pero a priminti cu e aña aki lo traha hunto pa asina haci e Festival di Tumba 2024 uno mas grandi y exitoso mara na e celebracion di Carnaval 70. Esey no tabata e caso y e bandanan ta lamenta esey, di cual a pone cu nan no ta participa n’e festival.
No ta solamente e bandanan ta riba e opinion aki, pero e cantantenan participante ta riba e mesun linea. A informa nan tur, kendenan ya caba tabatin preocupacion ya cu no tabatin informacion na ora. A sinta cu e presidente pa bin cu e cambionan Mester drecha con ta organisa e Festival di Tumba y p’esey e agrupacionnan aki ta haya cu tin di tuma esaki mas na serio.
Duna tumba su balor bek
Jairo Evertsz di Buleria a expresa cu den parada di carnaval tin banda ta toca tumba. Nan stima tumba y nan ta pidi pa esaki ta parti di carnaval. Tambe ta pidi pa tumba haya su balor, su espacio manera e tabata antes. Nan no ta papia di tumba grandi so, pero esun di tumberito tambe. Nan ta haya conseho y kier haci cambio, pero kier sa con ta para cu esun di mucha cu ta e futuro.
Dedica na tumba pa Carnaval 70
Roderick ‘Rocco’ Franken, tumbero y cantante di Buleria, a expresa cu e su intencion no tabata pa bay canta Soca pero dedica na tumba ya cu esaki ta Carnaval 70. El a scoge riba dedica tumba di Aruba y no bay Corsou. El a inscribi pa Soca sin un cantica. E ta lamenta cu cos a cana asina y a yega momento di pone pia abou. E ta pidi pa SMAC delega e trabou y duna un tumba na esunnan cu tin conocemento di e canticanan aki. Duna un comision apart pa tumba. SMAC kier promove e festival aki pa dia 14 di januari, pasobra no kier stroba den promove e otro actividadnan di carnaval.
Festival bira grandi
Chendell Beaumont, Rey di Tumba 2023 y cantante di Suona, a uni n’e cu e bandanan aki. E ta stima tumba, y ta dedica tambe na tumberito. Tur aña e tin tres pa cuater tumberito y tin biaha e ta traha cantica di tumba pa grandi, sin lubida cu e mes ta un participante. Su persona tambe kier mira Festival di Tumba bira grandi, esta haya cinco pa seis mil hende. E ta kere cu mester di hende cu si ta kere den e producto di tumba y den un festival cu ta duna e atencion necesario.
Tuma rienda pa haci festival grandi
Julissa Hoevertsz, representante di DLS, a indica cu nan tin varios corona na nan nomber y ta carga e festival aki pa hopi tempo. A participa den e festival aki cu hopi amor, y p’esey ta uni na e otro bandanan pa no participa. Nan ta kere cu e Festival di Tumba tin un potencial enorme. Ta n’e musiconan pa pone pia abou y bisa cu esaki ta momento pa tuma e rienda pa haci festival grandi.
