E siman aki e controversianan rond di proteccion di nos beachnan a continua den boca di pueblo, cu e biaha aki via un post riba rednan social cu a mustra cierto boulders buta na Santo Largo, Savaneta, pa proteccion di e beach. Nos a puntra Minister encarga cu Turismo, Dangui Oduber, tocante un publicacion cu el a comparti riba su Facebook page cu ta mustra un potret unda ta mira algun baranca cu ta blokia entrada p’e beach.
Minister Oduber ta bisa cu nan ta hibando un maneho basa riba sostenibilidad, cu ta basa riba proteha nos beachnan particularmente. “Nos a nota cu n’e beach aki na Santo Largo pa hopi aña largo e beach aki ta afecta pa autonan cu ta bay te ariba e beach, hopi cerca di e lama.” Azeta y gasolin ta cay, automobilistanan ta susha y daña e beach.
E mandatario ta haya cu nos beachnan ta un recurso natural cu Dios a bendiciona nos cu ne, algo cu nos tin cu proteha pa nos propio local por haci uzo di dje. “Pero tambe pa nos turistanan cu ta bin Aruba haci uzo di nan.” Y pa loke ta e beach aki, e ta sufriendo pa basta aña.
A haya un peticion tambe for di Fundacion Savaneta cu tin diferente projecto andando pa asina Savaneta tambe haya parti di e bolo cu turista por ofrece na nos desaroyo. Den cuadro di esaki gobierno a pensa lo ta ideal pa pone boulders grandi pa evita cu local y turista ta yega cu nan auto te na costa di lama. Asina por proteha y conserva recurso naturalnan aki segun minister Oduber, y tambe siguientemente lo bay drecha y embeyece e beach aki pa tur local cu ta haci uzo di e area aki.
Gobierno lo bay pidi cooperacion di Aruba Ports Authority pa mira con por yega na un acuerdo p’e santo blanco cu nan tin y haci uzo di dje pa haci e beach mas atractivo. “Caminda nos localnan por haya un beach acerca caminda anteriormente por ta no hopi lo tabata uza e beach of pensa riba dje. P’esey ta e motibo tras e intencion di pone barancanan aki pa evita cu auto ta sigui daña e beachnan aki.”
