Diabierna anochi alrededor di 8:15 pm a sosode un accidente riba Watty Vos Boulevard. Aki ta caminda cu chauffeur di un Ford Edge color preto, numera A-16417 a perde control y por poco a bolter fo’i brug. E impacto tabata asina fuerte cu hasta airbag a sali. Debi na e comportacion di e chauffeur, no a keda e polis nada otro di haci un test di alcohol cu ne.
E chauffeur berdad a admiti cu despues di trabou el a dal algun drinks. A detene y transport’e pa ward’i polis caminda a present’e dilanti un subfiscal kende lo dicidi sea riba su encarcelacion of libertad. Polis a regla pa un takelwagen bin busca e auto for di e sitio. E accidente a sosode net prome cu rotonde Cumana, si bo ta bin for di rotonde Paperclip.
